آوروپا بیرلیگی- آمریکا علاقه‌لری‌نین گله‌جگی، بروکسل‌ده مذاکیره ائدیلدی
بیرلیک خاریجی ایشلر ناظیرلری، بروکسل‌ده غیری-رسمی توپلانتیدا بیر آرایا گلدی
آوروپا بیرلیگی- آمریکا علاقه‌لری‌نین گله‌جگی، بلژیک‌ین باشکندی بروکسل‌ده مذاکیره ائدیلدی.
بیرلیک خاریجی ایشلر ناظیرلری، بروکسل‌ده غیری-رسمی توپلانتیدا بیر آرایا گلدی.
آوروپا بیرلیگی، دونالد ترامپ باشقان‌لیق یئنی آمریکا رهبرلیگی موضوعسوندا اورتاق بیر موضع بلیرلمه‌یه چالیشیر.
توپلانتیدا، فرانسا، مجاریستان و بیرلیکدن آیریلما قراری آلان اینگیلتره، خاریجی ایشلر ناظیری سویه‌سینده تمثیل ائدیلمه‌دی.
اینگیلتره خاریجی ایشلر ناظیری بوریس جانسون، توپلانتی‌نین گرک‌سیز اولدوغونو آچیقلادی.
فرانسا خاریجی ایشلر ناظیری ژان-مارک آیرو ایسه بیرلشمیش میللت‌لر تشکیلاتی‌نین باش کاتیبی سئچیلن آنتونیو گوترس ایله گؤروشه‌جگی سببیله بروکسل‌ه گئتمه‌دی.
ترامپ‌ین ظفرینی مثبت گؤرن تک بیرلیک عضوو اولان مجاریستان دا خاریجی ایشلر ناظیری توپلانتیا گؤندرممه‌نی سئچدی.
توپلانتی سونوندا آوروپا بیرلیگی خاریجی ایلیشکی‌لر و گوون سیاستی یوکسک نماینده‌سی فدریکا موگرینی آچیقلاما وئردی.
موگرینی، بیرلیک عضو‌لری‌نین، ترانس آتلانتیک ایلیشکی‌لری‌نین گوجلندیریلمه‌سینه داوام ائتمه موضوعسوندا راضی اولدوغونو قید ائتدی.
موگرینی، آوروپا بیرلیگی و آمریکانین پارتنر اولدوغونو، دگرلر، پرینسیپ‌لر و چیخارلار تملینده بونون بئله داوام ائتمه‌سینی اهمیت وئردیک‌لرینی وورغولادی.
فدریکا موگرینی، ایقلیم دییشیک‌لیگی، ایرانلا الده ائدیلن نوکلئر آنلاشماسی گله‌جگی و تیجارت مسئله‌لری‌نین اؤزلری اوچون اهمیت‌لی اولدوغونو دا ایفاده ائتدی.
ترامپ، سئچیم کامپانیاسی اثناسیندا بؤیوک تیجارت آنلاشما‌لارینا قارشی اولدوغونو سؤیلمیشدی.
بو سببله، اگر تامامیله لغو ائدیلمزسه بیرلیک ایله واشینگتون آراسیندا ترانس آتلانتیک تیجارت و یاتیرم طرفداش‌لیغی مذاکیره‌لری‌نین چتین کئچه‌جگی نظرده توتولور.
ترامپ‌ین، آوروپا اؤلکه‌لری‌نین ناتو اوچون داها چوخ خرجلمه ائتمه‌سینی ایستمه‌سی و آوروپانین ساوونماسینی گئری پلانا آتماسی دا ناراحات‌لیق یارا‌دیر.
دونالد ترامپ دؤورونده موسکوا-واشینگتون موناسیبت‌لری‌نین یاخشیلاشما احتیمالی، کریمه‌نین ایلحاقی اوزون‌دن روسیایا تحریم ایجرا ائدن آوروپانی دوشوندورور.
ایرانلا الده اولونان نوکلئر آنلاشماسی گله‌جگی و ایقلیم دییشیک‌لیگی موضوعلاریندا دا اوروپا بیرلیگی و ترامپ فرق‌لی دوشونور.
