بان کی-موون، نتانیاهونون سؤزلری‌نین، "چوخ چیرکین و قبول ائدیله بیلمز" اولدوغونو سؤیله‌دی
بان، "شدت و یئنی مسکونلاشما واحیدلری‌نین قورولماغا داوام ائتمه‌سی، ایکی دولت‌لی حل یولو هدفی یئرینه تک دولت رئال‌لیغینا گتیریر" دئیه دانیشدی
بیرلشمیش میللت‌لر تشکیلاتی‌نین باش کاتیبی بان کی-موون، "مسکونلاشما واحیدلرینی گئنیشلدممیزه قارشی چیخان‌لار، اتنیک تمیزلیگی دستکلییر" آچیقلاماسی ائدن ایسرائیل باش ناظیری بنیامین نتانیاهونون سؤزلری‌نین، "چوخ چیرکین و قبول ائدیله بیلمز" اولدوغونو سؤیله‌دی.
بان کی-موون، بیرلشمیش میللت‌لر تشکیلاتی‌نین امنیت شوراسیندا، "یاخین شرق و فیلیسطین پروبلمی" باش‌لیق‌لی تشکیل ائدیلن توپلانتیدا، ایسرائیلین، فیلیسطین تورپاق‌لاریندا اونلارلا ایلدیر داوام ائتدیردیگی مسکونلاشما واحیدی قورما سیاستی اوزون‌دن 500 مین‌دن چوخ ایسرائیل‌لی‌نین، فیلیسطین تورپاق‌لارینا یئرلشدیگینی وورغولاییب.
بو وضعیتین، فیلیسطین دولتی‌نین قورولماسی هدفینه تامامیله ترس اولدوغونا دقت چکن بان،
"شدت و یئنی مسکونلاشما واحیدلری‌نین قورولماغا داوام ائتمه‌سی، ایکی دولت‌لی حل یولو هدفی یئرینه تک دولت رئال‌لیغینا گتیریر" دئیه دانیشدی.
فیلیسطین تورپاق‌لارین‌داکی ایسرائیل مسکونلاشما‌لاری‌نین، اولوسلار آراسی حقوقا ضد اولدوغونو وورغولایان باش کاتیب، فیلیسطین‌لی‌لره یؤنلیک ایشغال و باسقی‌نین سونا چاتماسی لازیم اولدوغونو قید ائتدی.
غزّه‌دکی محاصیره‌نین تأثیرلرینه ده توخونان بان، محرومیت‌لر سببین‌دن، تخمینن 2 میلیون غزّه‌لی‌لرین چتین وضعیتده اولدوغونو آچیقلادی.
بان، غزّه‌دکی وضعیتین، غیری-ثابت‌لیک و حدین‌دن آشیریلیغی بسلدیگینی قید ائتدی.
