آمریکا تورکیه و فئتو آراسیندا سئچیم ائتمهیه احتیاج گؤرمور
بو بارهده آمریکا خاریجی ایشلر ناظیرلیگینین سؤزچوسو الیزابت ترودو گونلوک مطبوعات کونفرانسیندا بیلدیردی.
بو بارهده آمریکا خاریجی ایشلر ناظیرلیگینین سؤزچوسو الیزابت ترودو گونلوک مطبوعات کونفرانسیندا بیلدیردی.
او خاطیرلاتدی کی، اعاده مسئلهسی ایله علاقهدار ایکی اؤلکه آراسیندا راضیلاشما وار و فئتو باشچیسی فتح الله گولهنین قایتاریلماسیندا آمریکا همین موقاویلهدن ایرهلی گلن عهده لیکلرینی یئرینه یئتیرهجک.
توکیه دؤولت باشچیسی رجب طیب اردوغانین ایقامتگاهی قارشیسیندا دموکراسی کئشیگی چکن وطنداشلارا "گئج-تئز آمریکا سئچیم ائدهجک. یا تورکیه، یا دا فئتو" سؤزلری خاطیرلاتیلان الیزابت ترودو بونا دایر آچیقلاما وئرهبیلمهجگینی، لاکین "فئتو یا دا تورکیه" سئچیمینین دوغرو اولمادیغینی ایفاده ائتدی.
آمریکا خاریجی ایشلر ناظیرلیگینین سؤزچوسو بونونلا باغلی سوالی بئله جاوابلاندیردی: "تورکیه و یا فئتو آراسیندا سئچیم ائتمهگیمیزه احتیاج یوخدور. قایتارما حاقیندا قانون قطعیدیر. موقاویلهده ده دئییلدیگی کیمی تورکیهیه دستکیمیز و امکداشلیغیمیز مباحثه مسئلهسی دئییل."
اعاده پروسئسینین آیدین، هر هانسی بیر تأثیرین یول وئریلمز اولدوغونو وورغولایان ترودو خاطیرلادی کی، بونونلا باغلی بعضی سندلر آلینیب. آراشدیرمالار تورکیه ایله دوستلوق موناسیبتلریمیز و دانیشیقلار یولو ایله داوام ائدیر. لاکین بو حقوقی چرچیوهدهدیر و قانونی شکیلده آپاریلیر.
قایتاریلما پروسئسینین نه واختا باش توتاجاغینا دایر سوالی خاریجی ایشلر ناظیرلیگینین سؤزچوسو "آیلار یا دا ایللر سونرا اولا بیلر، دقیق زامان بللی دئییل"-دئیه جاوابلاندیردی.
تورکیه خاریجی ایشلر ناظیری مؤلود چاووش اوغلونون روسیانی داعشا قارشی بیرگه موباریزهیه دایر چاغیریشینادا توخونان الیزابت ترودو تورکیه و دیگر موتتفیقلریله سؤزوگئدن ترور تشکیلاتینا قارشی موباریزه مؤوضوعسوندا یاخین تماسدا اولدوقلارینی بیلدیردی. علاوه ائتدی کی، بیرگه موباریزه آلقیشا لاییقدیر.
آمریکا خاریجی ایشلر ناظیرلیگینین سؤزچوسو دیاربکر و ماردینده پ.ک.ک طرفیندن تؤرهدیلن ترورو پیسلهدیکلرینی و حیاتینی ایتیرنلرین عائلهلرینه باش ساغلیغی وئردیکلرینی ده بیلدیردی.