مرکل اردوغان ایله گؤروشهجگینی آچیقلادی
مرکل تورکیهدکی وضعیتی یاخیندان ایزلهدیکلرینی بیلدیردی.
![مرکل اردوغان ایله گؤروشهجگینی آچیقلادی](http://cdn.trt.net.tr/images/xlarge/rectangle/7fc3/897d/8421/579a264c49cda.jpg?time=1719081505)
"چئوریلیش جهدی ایله قارشیلاشان بیر اؤلکهنین بونو حیاتا کئچیرنلره قارشی حقوق دؤولتینین بوتون ایمکانلارینی ایشه داخیل ائتمهسی دوزگون و اؤنملیدیر".
بونو آلمانیا باش ناظیری آنگلا مرکل فدرال مطبوعات ائوینده تشکیل ائتدیگی توپلانتیدا دئدی.
مرکل تورکیهدکی وضعیتی یاخیندان ایزلهدیکلرینی بیلدیردی و یاخین گلهجکده دؤولت باشچیسی اردوغانلا گؤروش کئچیریب کئچیرمهیهجگینه دایر سوالا جاوابن دئدی کی، ان گئج سپتامبر آییندا گ 20 اجلاسیندا بیر آرایا گلهجهیک. ترورلا موباریزه مؤوضوسوندا تورکیهنین اهمیتلی اؤلکه اولدوغونو وورغولایان مرکل قئید ائتدی کی، قاچقینلارین قورونماسی ساحهسینده تورکیه نمونه ایشلر گؤردو. صحبت بو اؤلکهدکی 3 میلیون قاچقیندان گئدیر.
آوروپا اتفاقینین تورکیهیه مادی باخیمدان یاردیم ائتمهسینین دوزگون اولدوغونو ایفاده ائدن مرکل تورکیه ایله اتفاق آراسیندا قاچقینلارلا علاقهلی رازیلاشما ایله قئیری-قانونی ایشلرین قارشیسینین آلیندیغینی و تورکیهنین اؤنملی بیر طرفداش اؤلکه اولدوغونو بیلدیردی.
دؤولت باشچیسی رجب طیب اردوغان ایله ترور تشکیلاتی پ.ک.ک ایله موباریزه مسئلهسینی مختلیف گؤروشلرده موذاکیره ائتدیکلرینی ده دیله گتیرن مرکل پ.ک.ک-نین اؤلکهسینده قاداغان اولدوغونو و ترور تشکیلاتلاری لیستهسینه سالیندیغینی، بونونلا علاقهلی هر مسئلهنی یاخیندان تعقیب ائتدیکلرینی سؤیلهدی.