آمریکا: سوریهده گوونلی بؤلگه یارادیلماسی موضوعسوندا فیکیرلریمیز دییشمدی
ارنست، "چاتیشمالارین دایاندیریلماسی راضیلاشماسینین یئنیلنمهسینی دایاتمالیییک. روسیا، اسد رژیمی اوزریندکی تأثیرینی ایستیفاده ائدهرک، اسدین سؤزلرینی یئرینه یئتیرمهسینی تامین ائتمهلیدیر" دئدی
![آمریکا: سوریهده گوونلی بؤلگه یارادیلماسی موضوعسوندا فیکیرلریمیز دییشمدی](http://cdn.trt.net.tr/images/xlarge/rectangle/d27a/3dfd/31ad/56d0251e6e43c.jpg?time=1718863227)
آمریکا، سوریهده گوونلی بؤلگه یارادیلماسی موضوعسوندا فیکیرلرینین دییشمدیگینی بیلدیردی.
آغ ائو مطبوعات سؤزچوسو جاش ارنست، گوندهلیک مطبوعات کونفرانسیندا، سوریهده داوام ائدن ایچ ساواشینا باغلی سواللاری جواب، سوریهده گوونلی بؤلگه یارادیلماسی حاقیندا پرزیدنت باراک اوبامانین فیکرینین دییشمدیگینی ایفاده ائتدی و
"اوباما، گوونلی بؤلگه میدانا گتیرمهنین بو آندا سوریهده باش وئرنلره پراکتیک بیر آلترناتیو میدانا گتیرجگینی دوشونمور" دئدی.
پرزیدنت اوبامانین گوونلی بؤلگه فیکرینه قارشی اولدوغونو سؤیلهین ارنست،
"باشیندان بری بونو سؤیلهییر، چونکی آمریکانی بونو ائتمهیه مجبور ائدن بیر دوروما سالماق ایستمیر. یوغونلاشمامیز لازیم اولان ساحهده داعشه قارشی موباریزه اولمالیدیر." ایفادهسینی ایستیفاده ائتدی.
اولوسلار آراسی طرفلرین سوریهده چاتیشمالارین دایاندیریلماسی موضوعسوندا وئردیکلری سؤزلری یئرینه یئتیرمهسی لازیم اولدوغونو ایفاده ائدن ارنست،
"چاتیشمالارین دایاندیریلماسی راضیلاشماسینین یئنیلنمهسینی دایاتمالیییک. خصوصیله بشار اسد رژیمی، وئردیگی سؤزلری یئرینه یئتیرمهلی. روسیا، اسد رژیمی اوزریندکی تأثیرینی ایستیفاده ائدهرک، اسدین سؤزلرینی یئرینه یئتیرمهسینی تامین ائتمهلیدیر" دئدی.
آمریکا خاریجی ایشلر ناظیرلیگی سؤزچوسو جان کیربی ده بیر سوال اوزرینه حلب اطرافیندا گوونلی بؤلگه یارادیلماسینی قیمتلندیردی.
سوریهده یالنیز معین بیر بؤلگهنین دئییل، اؤلکهنین بوتونونون گوونلی اولماسینی اومید ائتدیکلرینی وورغولایان کیربی،
"چاتیشمالارین دایاندیریلماسی راضیلاشماسی بوتون سوریهیه یاییلمالی. بیز بونو پلانلاشدیریریق" دئدی.
حلبده وطنداش خالقا قارشی ائدیلن سالدیریلاری "اؤلچوسوز" اولاراق قیمتلندیرن کیربی،
"بونلار سونا چاتمالی. اسد رژیمی وطنداش خالقی هدف آلماغا داوام ائدیر. ایندی ایسه گوناهسیز اینسانلاری و ساغلیق ایشچیلرینی هدف آلیر و بو قطعیلیکله قیناناجاق بیر وضعیتدیر" دئیه دانیشدی.