ترومپ: ایران تروریست، اوباما باجاریقسیز
جمهوریتچی‌لر پارتیسی‌نین باشقانلیق نامیزدی دونالد ترومپ، ایرانی تروریست، دؤولت باشقانی اوبامانی دا باجاریقسیز اولا‌راق دگرلندیردی
روس خبر سیته‌سی سپودنیک: آمریکادا جمهوریتچی‌لر پارتیسی‌نین باشقانلیق نامیزدی اولان دونالد ترامپ، ایرانی تروریست، دؤولت باشقانی اوبامانی دا باجاریقسیز اولا‌راق دگرلندیردی. ترامپ، اقتدارا گلمه‌سی حالیندا 5 + 1 اؤلکه‌لری و ایران آراسیندا ایمضا‌لانان آنلاشمانی دا تهران ایله یئنیدن مذاکیره ائدجیینی سؤیله‌دی.
ایران و 5 + 1 اؤلکه‌لری‌نین تخمینا 2 ایل داوام ائدن نوکلئر مذاکیره‌لرین نتیجه‌سینده 14 جولایدا ایمضالادیق‌لاری آنلاشما چرچیوه‌سینده، تهران، نوکلئر تاسیس‌لری‌نین کنترل ائدیلمه‌سینی قبول ائتدی. بونون قارشیلیغیندا باتی اؤلکه‌لری، ایرانا اویقولانان تحریملری قالدیرماغی تعهد ائتدی.
میلیاردر ایش آدامی، "آمریکا پرزیدنتی باراک اوبامانین تروریست ایران ایله عینی آنلاشمانی ایمضالادیغینا اینانابیلمیرم. بو چوخ پیس، یئترسیز و برباد شکیلده مذاکیره ائدیلمیش، هم آمریکانین، هم ده ایسراییل کیمی متفیقلریمیزین گوونلیگینی تهلوکه‌یه آتان بیر آنلاشما" دئدی.
ترامپ، آیریجا مذاکیره مدتینی آماتور اولا‌راق دگرلن‌دیره‌رک، "آنلاشمان اوچون خرج‌لنن زامان، اوبامانین و باشقا پولیتیکاچی‌لاریمیزین نه قدر باجاریقسیز اولدوغونو بوتون دونیایا بیر دفعه داها گؤستردی" سؤزلرینی دیله گتیردی.
آنلاشما ایله ایرانین نوکلئر بیر گوج حالینا گله‌جیینی وورغولایان جمهوریتچی نامیزد، تهرانین بؤیوک بیر تهلوکه تشکیل ائتدیگینی ساووندو. ترامپ، "باشقان سئچیلیرسم، ایرانلا یئنیدن مذاکیره ماساسینا اوتوروب و آمریکا کنگره‌سینه ایرانا بوتون دونیادا تروریزمه ایسپونسورلوق ائده‌بیلممه‌سی اوچون یئنی یاپدیریملار اویقولاماسینی ایسته‌یه‌جه‌یم" دئدی.
