2014 ترور راپورو
راپوردا اؤلوم‌لرین هارداسا ایکییه قاتلاندیغی و آدام قاچیرما‌لارین اوچ قاتینا چیخدیغی بیلگیسینه یئر وئریلدی
آمریکا خاریجی ایشلر باخانلیغی 2014 ترور راپورونو آچیقلادی.
باخانلیق ایللیک قلوبال راپوروندا، 2014ده‌کی ترور سالدیری‌لاریندا داعش و بوکو حرام طرفین‌دن تشکیل ائدیلن ائیلم‌لرین اوچده بیر نیسبتینده آرتدیغی، اؤلوم‌لرین هارداسا ایکییه قاتلاندیغی و آدام قاچیرما‌لارین اوچ قاتینا چیخدیغی بیلگیسینه یئر وئریلدی.
راپورا گؤره، 2014.جو ایلده دونیادا تشکیل ائدیلن 13 مین 500 ترور سالدیریسیندا تخمیننا 33 مین نفر حیاتینی ایتیردی. 2013.جو ایلدکی تخمینا 10 مین ترور ائیلمینده 18 مین‌دن چوخ انسان حیاتینی ایتیرمیشدی.
راپوردا، 24 آمریکا وطنداشی‌نین گئچن ایل آشیریلیق یان‌لی‌لاری طرفین‌دن اؤلدورولدوگو قید ائدیلدی. ایکی ایل اؤنجه 3 مین 137 اولان آدام قاچیرما حادثه‌لری‌نین ایسه 2014.جو ایلده 9 مین 428 نفره یوکسلدیگی وورغولاندی.
راپور، ساییلارداکی آرتیشی عراق، افغانیستان و نیجریه‌ده چوخ ساییدا انسانین اؤلمه‌سیله نتیجه‌لنن ترور ائیلملرینده‌کی یوکسلیشه باغلادی.
راپورا گؤره، 2014ده‌کی ترور سالدیری‌لاری 95 اؤلکه‌ده تشکیل ائدیلدی آنجاق بون‌لار اورتادوغو،گونئی آسیا و باتی آفریقادا سیخلاشدی. سالدیری‌لارین یوزده 60ین‌دان چوخو عراق، پاکیستان، افغانیستان، هیندیستان و نیجریه‌ده تشکیل ائدیلرکن، سوریه‌ده‌کی سالدیری‌لارین علاوه ائدیلمه‌سیله نیسبت یوزده 80ه یوکسلیر.
راپوردا آیریجا داعشین، سیرا‌لارینا خاریجی ساواشچی آلماغی داوام ائتدیردیگینه و لیبی، مصر و نیجریه کیمی اؤلکه‌لرده ده اؤزلرینه باغلی‌لیق اعلان ائدن اولوشوملارا ایشاره ائدیلدی. اؤته یاندان داعش و باشقا آشیریلیق طرفداری قروپ‌لارلا مباریزه‌ده بؤلگه‌سل و اولوسلارآراسی چابا‌لاردا ایره‌لیلمه اولدوغو وورغولاندی.
