ایسراییل غزه-ده یئنی‌دن خسته‌خانا‌لاری هدفه آلیب
ایسراییل 35 گون‌دور قیرغین‌لار تؤره‌دیر.
ایسراییل 35 گون‌دور قیرغین‌لار تؤره‌دیر. ایسراییل دؤیوش اوچاق لاری غزه زولاغین‌داکی رانتیسی اوشاق خسته‌خاناسینی بیرباشا هدفه آلیب.
شفا خسته‌خاناسی‌نین حیاطینی، العوده و اندونزیا خسته‌خاناسی‌نین اطرافینی بومبالاییب‌لار.
الاقصی تلویزیونونون "تلگرام" کانالیندا پای‌لاشیلان خبره گؤره، ایسراییل ساواش اوچاق لاری رانتیسی اوشاق خسته‌خاناسینی بیرباشا هدفه آلیب.
غزه-ده‌کی فیلیسطین ساغلیق ناظیرلیگی آچیقلاماسیندا ایسراییلین خسته‌خانانی بیرباشا هدفه آلماسی نتیجه‌سینده خسته‌خانانین زیرزمیسینده و بعضی تاسیس لرینده بؤیوک یانغین‌لارین باش وئردیگینی بیلدیریب.
آچیقلامادا اؤلن و یارا‌لانان‌لار باره‌ده معلومات وئریلمه‌ییب.
ایسراییل شفا خسته‌خاناسی‌نین اطرافینی دا هدف آلیب
فیلیسطین ساغلیق ناظیرلیگی‌نین غزه اوزره سؤزچوسو اشرف القدره وئردیگی آچیقلامادا، ایسراییل اوردوسونون مین‌لرله یارا‌لی و سیویل شخصین اولدوغو غزه-نین ان بؤیوک ساغلیق موسسه‌سی اولان شفا خسته‌خاناسی‌نین حیاطینی هدفه آلدیغینی بیلدیریب.
هوجوم زامانی 2-سی آغیر اولماقلا 4 نفرین یارالاندیغینی بیل‌دیرن القدره، مین‌لرله اینسانین سیغیندیغی خسته‌خانانین هدف آلینماسی‌نین چوخ تهلوکه‌لی بیر آددیم اولدوغونو وورغولاییب.
فیلیسطین-ین وفا خبر آژانسیندا یئر آلان خبره گؤره، ایسراییل اوردوسو مین‌لرله فیلیسطین‌لی‌نین، ائله‌جه ده یارا‌لی و خسته‌لرین سیغیندیغی اندونزیا خسته‌خاناسی اطرافیندا دا چوخ شدت‌لی هوجوم‌لار حیاتا کئچیریب.
خبرده هوجوم‌لارین خسته‌خانانین بعضی حیسه‌لرینه جدی زیان ووردوغو و اینسان‌لار آراسیندا جدی پانیکایا سبب اولدوغو، اؤلن و یارا‌لانان‌لارین اولدوغو بیلدیریلیب.
فیلیسطین قیزیل آی جمعیتیندن وئریلن یازیلی آچیقلامادا ایسراییل اوردوسونون غزه زولاغی‌نین قوزئیینده‌کی جبالیا-داکی العوده خسته‌خاناسی‌نین اطرافینی دا بومبالادیغی بیلدیریلیب.
آچیقلامادا هوجومدا بیر کؤنول‌لونون یارالاندیغی، قیزیل آی جمعیتینه عایید ایکی عاجیل یاردیم ماشینی‌نین ایسه خیدمت‌دن چیخدیغی بیلدیریلیب.
فیلیسطین قیزیل آی رسمی‌لری ده اؤز یازیلی آچیقلاما‌لاریندا، "بؤیوک بیر فلاکت" باش وئرمه‌میشدن اول طبی لوازیمات و یانا‌جاق تامین ائتمک اوچون اولوسلار آراسی توپلومو عاجیل موداخیله‌یه چاغیریب‌لار.
