ولودیمیر زلنسکی آنتونیو گوترش کیئوده ایله گوروشوب
ولودیمیر زلنسکی آنتونیو گوترش ایله راضیلیق الده ائتدیکلرینی بیلدیریب.
اوکراینا پرزیدنتی ولودیمیر زلنسکی بیرلشمیش میللتلر تشکیلاتینین (بمت) باش کاتیبی آنتونیو گوترش ایله گؤروشونده قارا دنیز تاخیل تشببوسونو مارسین 18-دن سونرا داوام ائتدیرمهیه راضیلاشدیقلارینی بیلدیریب.
زلنسکی پایتاخت کیئوده گوترش ایله گؤروشوندن سونرا تشکیل ائدیلن بیرگه مطبوعات کنفرانسیندا دئییب:
"روسیا اوکراینادا نظارت ائتدیگی زاپوروژیه آتوم الکتریک ایستانسیاسینی شانتاژ ائئدیر. زاپوروژیه آتوم الکتریک ایستانسیاسی اوکراینانین تام نظارتینه قاییتمالیدیر. بو، تکجه اوکراینانین دئییل، قلوبال تهلوکهسیزلیک مسئلهسیدیر.
آنتونیو گوترش ایله 18 مارسدان سونرا قارا دنیز تاخیل تشببوسونون داوام ائتدیریلمهسی مسئلهسینی موذاکیره ائتدیک. بو گون بیز قارا دنیز تاخیل تشببوسونون 18 مارسدان سونرا داوام ائتدیریلمهسینین بوتون دونیا اوچون کریتیک بیر احتیاج اولدوغو بارهده راضیلیغا گلدیک.
بمت-نین باش کاتیبی آنتونیو گوترش ایسه روسیانی اوکراینایا هوجومدا اتهام ائدیب و بمت اولاراق اوکراینانین اراضی بوتؤولوگو و اگمنلیگینی دستکلهدیکلرینی وورغولاییب.
گوترش زاپوروژیئ آتوم الکتریک ایستانسیاسینین تهلوکهسیزلیگینین و قورونماسینین حیاتی اهمیت داشیدیغینی وورغولایاراق، بؤلگهنین تامامیله ترک-سلاح ائدیلمهسینین واجیبلیگینی دیله گتیریب.
کئچن ایل ایستانبولدا ایمضالانان قارا دنیز تاخیل تشببوسو سایهسینده اوکراینا لیمانلاریندان 23 میلیون توندان چوخ تاخیل صادر ائدیلدیگینی قئید ائدن گوترش (قارا دنیز تاخیل تشببوسو) قلوبال ارزاق قیمتلرینین آزالماسینا تحفه وئردی و خصوصیله اینکیشاف ائتمکده اولان اؤلکهلرده محاربه اوچون یوکسک قیمتلر اؤدهین اینسانلاری عاجیل یاردیملا تامین ائتدی" دئییب.
گوترش قئید ائدیب کی، سؤزوگئدن تشببوسون مدتی مارسین 18-دن سونرا دا اوزادیلمالیدیر.