ایران، نوکلئر دانیشیقلارا داوام ائتمک ایستهییر
"آمریکالیلارین ایرانا قارشی تهدید دیلیندن واز گئچمهدیکجه نتیجه اولمایاجاقلارینی آوروپا بیرلیگی نمایندهسینه ده سؤیلهدیم"
ایرانین خاریجی ایشلر باخانی حسین امیر عبداللهیان، اؤنجهکی حکومت دؤنمینده اتریشین باشکندی وینده گئچیریلهن و ژوئن آییندا آرا وئریلن نوکلئر دانیشیقلارا داوام ائتمک ایستهدیکلرینی سؤیلهدی.
ایران دؤولت تلویزیونوندا قاتیلدیغی بیر پروگرامدا دانیشان عبداللهیان، 2018ده اؤنجهکی آمریکا پرزیدنتی دونالد ترامپ یؤنتیمینین تک طرفلی چکیلدیگی نوکلئر آنلاشمانی جانلاندیرماق اوچون باتییلا آپاریلان انجاق ژوئن آییندا آرا وئریلن دانیشیقلار حاقیندا،
"ایران خالقینین ماراقلارینین تامین ائدیلدیگی دانیشیقلاری ممنونیتله قارشیلادیغیمیزی آچیقجا بیلدیردیک. بیز دانیشیقلار ماساسیندان قاچماغا چالیشمیریق و ۱۳.جو حکومت یالنیز ملموس قازانیملار دوغرولتوسوندا ایران و خالقینین ماراقلارینی تامین ائدن دانیشیقلاری داوام ائتدیرهجک" دئدی.
عبداللهیان، آمریکا پرزیدنتی جو بایدنین ۲۷ آگوستدا آغ ائوده اسرائیل باشباخانی نفتالی بنت ایله گؤروشونده "دیپلوماسیده اوغور اولماسا، باشقا سئچهنکلره حاضیریق" ایفادهسینه ایشاره ائدن عبداللهیان،
"آمریکالیلارین ایرانا قارشی تهدید دیلیندن واز گئچمهدیکجه نتیجه اولمایاجاقلارینی آوروپا بیرلیگی نمایندهسینه ده سؤیلهدیم" دئدی.
عبداللهیان ویندهکی نوکلئر دانیشیقلارین نه واخت باشلایاجاغی ایله باغلی سوالا بئله جاواب وئردی:
"قارشی طرف ایراندا یئنی حکومتین قورولماسینین ایکی و یا اوچ آی چکهجگینی بیلیر و بونونلا باغلی پلانلارینی قورابیلر. دانیشیقلار مطلق خاریجی ایشلر باخانلیغی و حکومتین گوندمینده اولان مؤوضوعلاردان بیریدیر" دئدی.