پوتین: بیزی بیر چاتیشمانین ایچینه چئکمهیه چالیشیرلار
"روسیانی تحریک ائدیرلر. بیزی بیر چاتیشمانین ایچینه چئکمهیه چالیشیرلار"
![پوتین: بیزی بیر چاتیشمانین ایچینه چئکمهیه چالیشیرلار](http://cdn.trt.net.tr/images/xlarge/rectangle/e050/f6e4/250b/58a5aabf67c44.jpg?time=1718576867)
روسیا دؤولت باشقانی ولادیمیر پوتین، ناتونون روسیانی داواملی اولاراق "تحریک ائتدیگینی" ادعا ائدهرک "بیزی بیر چاتیشمانین ایچینه چئکمهیه چالیشیرلار" دئدی.
پوتین، موسکوادا روسیا فدرال تهلوکهسیزلیک سرویسی رهبرلیگیله کنفرانسیندا، گئچن ایل جولای آییندا ورشودا تشکیل ائدیلن ناتو ییغینجاغینی خاطیرلاداراق "بو ییغینجاقدا روسیا، 1989دان بو یانا ایلک دفعه ناتو اوچون گوونلیک تهدیدی اولاراق قبول ائدیلرکن، روسیانی داشیندیرماق رسمی میسیون اولاراق منیمسندی" دئدی.
ناتونون لیدئر اؤلکهلرین لیدئرلیگینده سرحدلرینین اؤتهسینده استراتژیک و کلاسیک سلاحلار یئرلشدیرمه سورهجینی گئدهرک سرعتلندیردیگینی وورغولایان پوتین، "روسیانی تحریک ائدیرلر. بیزی بیر چاتیشمانین ایچینه چئکمهیه چالیشیرلار" دئدی.
پوتین، ناتونو روسیانین ایچ ایشلرینه قاریشماق و ایستیقرارسیزلاشدیرمایا چالیشماقلا سوچلایاراق بو وضعیتی "قایغی وئریجی" اولاراق دگرلندیردی.
روس استخبارات سرویسی ایله آمریکا و باشقا ناتو عضوو اؤلکهلرین استخبارات سرویسلری آراسیندا تکرار دیالوگ قورولماسینین، بوتون طرفلرین خیرینه اولاجاغینا ایشاره ائدن پوتین، دانیشماسینی بئله داوام ائتدیردی:
"دیگر اؤلکهلرین گیزلی سرویسلری پوزولان دیالوگون مسئولو، روسیا دئییل. گلوبال ترورلا مباریزهده بوتون اؤلکهلر و اولوسلارآراسی قوروملار آراسیندا ایش بیرلیگی تامین ائدیلمهلیدیر. چونکو ترورون مالیهلشدیریلمهسی و یا تروریستلر حاقینداکی ان کیچیک بیر معلومات مبادیلهسی، اورتاق مباریزهمیزین تاثیرینی اؤنملی اؤلچوده آرتیرماقدادیر. کورهسل و بؤلگهسل گوجلرین طرفدارلارینین سیاسی و اقتصادی رقابتی سببیله اورتادوغو، آسیا و آفریقادا قانلی چاتیشمالار داوام ائدیر".