Türkiyä Qatar belän Berläşkän Ğaräp Ämirlekläreneñ ilçeleklären açuınnan qanäğät

Türkiyä tışqı êşlär ministrlığı Qatar belän Berläşkän Ğaräp Ämirlekläre arasında ilçeleklärneñ ike yaqlı bularaq yañadan açıluı belän bäyle bularaq yazmaça belderü bastırdı.

Belderüdä: "Qatar däwläte belän Berläśkän Ğaräp Ämirlekläreneñ ike yaqlı bularaq diplomatik wäkilçeleklären ozaq waqıttan soñ yañadan êşlätep cibärü qararın zur qanäğätlelek belän qarşılıybız. Bu qararnıñ töbägebezneñ tınıçlığına häm totrıqlılığına möhim öleş kertäçägenä ışanabız,” – dip äytelde.

Berläşkän Ğaräp Ämirlekläre tışqı êşlär ministrlığı bügennän başlap Berläşkän Ğaräp Ämirlekläreneñ Doha ilçelegen, Qatarnıñ da Äbu-Dabi ilçelege belän Dubai konsullığın yañadan açu qararın qabul itüen citkergän ide.

Soğud Ğaräbstanı, Berläşkän Ğaräp Ämirlekläre, Baxreyn häm Misır 2017nçe yılnıñ 5nçe iyün’ könne "terror törkemnären yaqlawı” raslawı belän Qatar belän böten diplomatik mönäsäbätlären özgän häm bu ilgä qarata iq’tisadi êmbargo qullana başlağan ide.

Qatar şuşı illärneñ böten gäyıpläwlären kire qaqqan bulsa, bu wazğıyät Farsı qultığı töbägendä krizisqa säbäp bulğan ide.

Farsı qultığı krizisı 2021nçe yılnıñ 5nçe ğıynwar könne Soğud Ğaräbstanınıñ Äl-Ula şähärendä uzdırılğan 41nçe Farsı qultığı xezmättäşlek şurası sammitında Ula beldergeseneñ imzalanuı belän xäl itelgän ide.

Soğud Ğaräbstanı tışqı êşlär ministrı Faysal bin Färxan Al Suud yuğarı däräcäle oçraşudan soñ oyıştırğan matbuğat oçraşuında Qatarğa êmbargo qullanğan illärneñ Doha belän diplomatik mönäsäbätlärne yañadan urnaştıruın häm çikläwlärneñ ğamäldän çığarıluın açıqlağan ide.