Çit illärdän yärdämnär kilü däwam itä

Cir teträwlärdän soñ Türkiyäneñ yaraların bäyläw öçen dön’yanıñ häp poçmağınnan yärdäm kilä.

İran afät töbäklärenä qır xastaxanäse, mediśina törkeme häm gumanitar yärdäm cibärde.  

Greśiya başqalası Afinadağı volontyerlar cir teträwdän zıyan kürüçelär öçen mêriya binasında yärdäm cıydı. Könbatış Trakyada da yärdäm mobilizaśiyäse däwam itä. Greśiyä basketbol ligasında bu atnadağı matçlarda kertelgän här ball öçen Türkiyä häm Süriyädä cir teträwlärdän zıyan kürüçelär öçen 10 yevro xäyriyä yasalaçağı belderlde.  

İtaliyadan Türkiyägä yärdäm kiterüçe xärbi korab yulğa çıqtı.

İspaniyäneñ başqalası Madridta cıyılğan yärdämnärne Türkiyägä cibärdelär.

Türkiyäneñ Varşava ilçelege koordinaśiyäsendä kiçä berençe yök maşinası yärdäm töyäp Pol’şadan yulğa çıqtı.  

Niderland xökümäte räise Mark Rutte, Kaxramanmaraş cir teträwlärennän soñ, Niderland diniyä waqıfınıñ Rotterdam mäçetenä barıp, zilzilädän zıyan kürüçelär öçen yärdäm cıyuçı volontyerlarğa räxmät äytte.

Angliyä başqalası Londondağı “Islamic Relief” dip ataluçı yärdäm oyışmasınıñ zilzilädän zıyan kürüçelär öçen başlağan yärdäm kampaniyäse qısalarında Finsberi park mäçetendä comğa namazınnan soñ xäyriyä cıyıldı. Anda Angliyä xökümäte räise Rişi Sunak ta qatnaştı.

Germaniyä Diniyä êşläre törek islam berlege cıyğan aqçalata yärdäm rekord däräcägä - 18 million yarım yevroğa citte.

Basıp alınğan Könbatış Yordanda da mäçetlärdä yasalğan yärdäm kampaniyäsendä 1 million dollar cıyıldı.

Katar tışqı êşlär ministrı Möxämmät bin Abdurraxman Al Sani belän AQŞ däwlät särqatibe Êntoni Blinkin başqala Vaşingtonda cir teträwlärdän zarar kürgän töbäklärgä yärdäm häm qotqaru operaśiyäläre öçen xalıqara tırışlıqlarnı koordinaśiyäläw yulların qaradı.

N’yu-York mêrı Êrik Adams Bruklinda cir teträwdän zıyan kürüçelärgä yärdäm cıyuçı törek mäçetenä bardı häm başqa illärgä härwaqıt yärdäm itüçe Türkiyäneñ yanında bulırğa teläwlären äytte.

AQŞnıñ farmaśevtika şirkäte Djonson ênd Djonson da 1 million dollar öleş kertte.

Paqıstannıñ Änkara ilçese Yusuf Cünäyd başqalanıñ Keçiörän rayonında oyıştırılğan yärdäm cıyu üzägendäge êşçänleklärdä qatnaştı.

Qırğızstan zilzilälärdän zıyan kürüçelär öçen cıyılğan gumanitar yärdämneñ berençe öleşen cibärde.

Aşxabadtan Törekmänstan däwlät başlığı Särdar Bärdimöxämmätovnıñ kürsätmäse belän mediśina häm sälamätlek kiräk-yaraqları, tekstil’, azıq-tölek êşlänmäläre häm törle qışqı kiyemnär cibärelde.

Türkiyädä belem alğan Senegal watandaşları cämğıyäte häm Türkiyä-senegal êş şurası Türkiyäneñ Dakar ilçelege aradaşçılığı belän aqçalata yärdäm cibärde.

Ğıyraqnıñ Kärkük şähärendäge barlıq mäçetlärdä Türkiyädä zilzilädän zıyan kürüçelär öçen yärdäm kampaniyäse başlandı.

Meñnärçä Bangladeş watandaşı Törek xezmättäşlege häm koordinaśiyä agentlığınıñ başqala Dakkadağı ofisına tonnalarça yärdäm kiterde.

Berläşkän Ğaräp Ämirlekläreneñ milli hawa yulı şirkäte Emirates Türkiyä häm Süriyädäge cir teträwdän zıyan kürüçelärgä aşığıç yärdäm kiterü öçen Dubaydan İstanbulğa hawa küpere qordı.

Qıtaynıñ logistika şirkäte Guançjou başlağan kampaniyä belän afät töbäkläre öçen yärdäm cıyıldı.

Kolumbiya xalqı başqala Bogotada zilzilä qorbannarı öçen yärdäm cıyu kampaniyäsendä qatnaştı.