İlbaşı Ärdoğan qabat BMO reformasına öndäde

İlbaşı Ärdoğan 24nçe üktäbr BMO köne häm Berläşkän Millätlär Oyışmasınıñ tözelüeneñ 77 yıllığı mönäsäbäte belän yullama yasadı.

Ärdoğan Türkiyäneñ tınıçlıq häm iminlek, keşe xoquqları häm daimi üseş ölkälärendä BMO qarşında alıp barıluçı êşçänlekkä iñ sizelerlek öleşen kertüçe häm äydäp baruçı rollärne üz östenä aluçı illärdän berse buluın belderde.

BMO ğomum byudjetına iñ küp öleş kertüçe berençe 20 ildän berse buluı belän bergä İstanbulnıñ BMO üzägenä äyländerü êşçänlege qısalarında BMOnıñ törle oyışmaları belän agentlıqlarınıñ regional’ üzäklären dä İstanbulda qabul itülären xäterlätüçe Ärdoğan:

“Bez BMO Ğomum särkätibe Antonio Guterreş belän xezmättäşlek êçendä alıp barğan köçle tırışlığıbız näticäsendä Ukraina aşlığınıñ Qara diñgez aşa dönyağa citkerelüen äydäp bardıq. İstanbul kileşüe qısalarında bügengä qadär 8 million tonnadan kübräk aşlıqnıñ häm oxşaş êşlänmälärneñ cibärelüen täêmin ittek. Cibärüneñ tuqtawsız başqarıluına qağılışlı diplomatik êlemtälärebezne tığız räweştä däwam itteräbez”, - dip bäyäläde.

Ärdoğan global’ tınıçlıqqa häm xozurğa yanawçı İslam doşmanlığı häm mädäni rasaçılıq belän köräştä añ-belemne kütärergä tırışuların, 15nçe martnıñ BMO Ğomum şurası tarafınnan Xalıqara İslamofobiya belän köräş köne itep iğ’lan itelüen dä äydäp barıp, bu yünäleştä möhim adım yasawlarına basım yasadı.

İlbaşı Ärdoğan:

"Näfrät klimatınıñ cämğıyät tınıçlığın ağulamawı öçen häm Berläşkän Millätlär Oyışması nigezendä häm dä ike yaqlı planda ğayrätlärebezne däwam itteräçäkbez. Här kön meñnärçä gäyıpsezneñ ülemenä säbäp bulğan krizislarnıñ çişeleşendä häm daimi üseşneñ täêmin itelüendä BMOnıñ tağın da aktiv rol’ aluı zarurlığı mäğlüm. Monıñ yulı da BMO İminlek şurasınıñ wäkillektä ğadellek prinśibına qarap reformalaştırıluınnan uza. Tağın da demokratik, ütä kürenmäle, êffektiv häm xisaplaşırğa tiyışle İminlek şurası xalıqara cämäğätçelekneñ urtaq ömete. Äğ’za däwlätlärneñ bötenese tigez räweştä wäkillek itelgän häm xalıqara cämäğätçelekneñ urtaq iradäsen çağıldırğan BMO Ğomum şurası da hiçşiksez nığıtılırğa tiyış.

Türkiyä Berläşkän Millätlär Oyışmasınıñ, BMOnıñ wäkillek itkän qıymmätlärneñ häm BMO êşçänlegeneñ köçle yaqlawçısı buluın däwam itäçäk. Şuşı töşençälär belän ilebez dä qoruçı äğ’zaläre arasında bulğan Berläşkän Millätlär Oyışmasınıñ 77 yıllığın qotlıym, BMO êşçänlegeneñ global’ tınıçlıqqa, totrıqlılıqqa häm isänlekkä öleş kertüen ömet itäm,” – dip belderde.