Türkiye İlbaşı: “Putin belän Zelenskiyne oçraştıru maqsatıbıznı üzlärenä äytäçäkmen”

İlbaşı Ärdoğan ike könlek Üzbäkstan säfärennän qaytışlıy jurnalistlarnıň sorawlarına cawap birde.

Rusiyä belän Ukraina arasındağı krizisnıň çişeleşe belän bäyle bularaq Putin häm Zelenskiy belän söyläşäçägenä basım yasawçı Ärdoğan: "Här ikesenä “Monnan arı maqsatıbız iň tiz arada sezne bergä oçraştıru” dip äytäçäkbez”, - dide.

İlbaşı: "Bez däwlät başlıqları däräcäsendäge cıyılışnı qabul itärgä äzer. Törkiyä bularaq mondıy barışta Putin bulmasın, Zelenskiy bulmasın, bezgä toyğan ışanıçları belän bu êşne tämamlaw bezne şatlandıraçaq”, - dip äytte.

Türkiyäneň Ukrainanıň iminlegen täêmin itüçe garant illärdän berse bula alaçağın belderüçe Ärdoğan: “Bez moňa prinśip bularaq uňay qarıybız, läkin neçkäleklärneň açıqlanuı kiräk”, - dide.

Türkiyä-İzrail mönäsäbätlärenä tuqtalıp uzuçı İlbaşı Ärdoğan: "Ramazan bäyrämennän soň (4nçe mayda) İzrail Baş ministrı Naftali Bennett belän küreşep şunda uq adım yasasaq, İzrail-Türkiyä bergälege, Könçığış Urta diňgez nefte belän, tabiğıy gazı belän bäyle barışnı tizlätäçäk”, - dip bilgeläp uzdı.

İlbaşı İzrail-Fälästin probleması belän bäyle bularaq: "(İzrail İlbaşı İśxak Gerśogqa) “Ramazan bäyrämendä möselmannar xozur êçendä Äl-Äqsa mäçetenä bara alsın. Bu mäs’älädä kiräkle yaqlawnı kürsätegez” didem”, - dip belderde.