Ärdoğan belän Bayden söyläşte

Törkiyä ilbaşı Räcäp Tayyip Ärdoğan Amerika Quşma Ştatları däwlät başlığı Djo Bayden belän telefonnan söyläşte. Anda Rusiyäneñ Ukrainağa höcümen dä kertep regional’ täräqqıyät’lär häm Törkiyä belän AQŞ mönäsäbätläre xaqında süz bardı.

Ärdoğan Rusiyä belän Ukraina arasında säyäsi çişeleş täêmin itü tırışlıqların däwam itäçäklären belderde. Ul krizisnıñ tağın da tiränäyü mömkinlegenä qarşı Törkiyäneñ ike yaq belän dä söyläşä aluı häm çişeleş êzläwdä ciñelläşterüçe poziśiyädä buluınıñ ähämiyäten assızıqladı.

İlbaşı Törkiyä açqan ışanıç kanalı näticäsendä Rusiyä häm Ukraina tışqı êşlär ministrlarınıñ Antaliyädä qara-qarşı utırıp söyläşä aluınıñ möhimlegenä dä basım yasadı. Anıñça, bu cıyılışnıñ oyıştırıluı üze genä dä diplomatiya uñışı.

İlbaşı Ärdoğan Törkiyäneñ AQŞtan 40 yaña oçqıç alu häm xäzerge F-16larnı modernizaśiyäläwne üz êçenä kertüçe taläbeneñ tiz arada näticägä ireşüen kötüen belderde, saqlanu sänäğate mäydanında Törkiyägä qarata barlıq xaqsız sankśiyälärne beterüneñ dä waqıtı citep uzuın äytte.