İlbaşı Ärdoğan Kongo Demokratik Cömhüriyätendä

Törkiyä İlbaşı Ärdoğan Afrika säfäreneñ berençe tuqtalışı Kongo Demokratik Cömhüriyätenä barıp citte.

Ärdoğannı İlbaşı Feliks Çisekedi räsmi tantana belän qarşı aldı.

Üzara häm wäkilleklärara söyläşülär belän ike il arasındağı kileşülärgä qul quyılğannan soñ Ärdoğan häm Çisekedi urtaq matbuğat oçraşuın oyıştırdı.

Törkiyä Däwlät başlığı biredä yasağan çığışında: “Törkiyä-Afrika urtaqlıq sammitında bez qabul itkän belderge häm ğamäl planı belän 2022nçe-2026nçı yıllarda ike yaqlı mönäsäbätlär cähätennän yul kartasın bilgelädek. Afrika illäre belän mönäsäbätlärebezne şuşı qısada êçkersezlek, qardäşlek nigezendä üsterergä däwam itäçäkbez”, - dip äytte.

Ärdoğan: "(Yaña tör koronavirusqa (“Kovid-19”ğa) qarşı) 100 meñ doza vakśinanı üzem belän bergä alıp kiterdem. Sälamätlek saqlaw ministrlığıbız ber million doza “Sinovak” häm 100 meñ doza “Turkovak” vakśinasın yänä cibäräçäk”, - dip belderde.

Kongo Demokratik Cömhüriyäte İlbaşı Çisekedi isä, “Törkiyä-Kongo mönäsäbätlärendä tarix kön” buluına basım yasap, säfärneñ ike il mönäsäbätlären yaña däräcägä citkeräçägen äytte.

Ärdoğan Kongo Demokratik Cömhüriyäte säfärennän soñ Afrika turına Senegal belän Gvineya-Bisauğa yasayaçaq räsmi vizitları belän däwam itäçäk.