Ärdoğan NATO sammitında kemnär belän oçraşaçaq?

Törkiyä ilbaşı Räcäp Tayyip Ärdoğan 14nçe iyün’dä Bel’giya başqalası Brüssel’dä uzaçaq NATO sammitında bik küp illärneñ liderları belän oçraşaçaq. Anıñ AQŞ ilbaşı Djo Bayden, Litva däwläte başlığı Gitanas Nauseda, Latviya ilbaşı Êgils Levits, Germaniya kanślerı Angela Merkel’, Böyekbritaniya xökümäte räise Boris Djonson, Greśiyä prem’yerı Kiryakos Miçotakis belän küzgä-küz utırıp söyläşüe kötelä. Monnan tış, Ärdoğannın Franśiya ilbaşı Êmmanuêl’ Makron häm Niderland xökümäte räise Mark Rutte belän dä oçraşuı planlaştırıla.  

Söyläşülärdä, NATOdağı ittifaq’nıñ tışında, ikeyaqlı mönäsäbätlär häm regional’ mäs’älälärneñ qaralaçağı uylanıla.

Ärdoğan belän Bayden oçraşuı – Baydennıñ AQŞ ilbaşı itep saylanuınnan soñ ike lidernıñ täwge tapqır küzgä-küz utırıp söyläşüe bulaçaq.

İlbaşı Ärdoğan citäkçelegendäge törek delegaśiyäseneñ NATO sammitındağı östenlekle könüzäge - Törkiyäneñ regional’ waqıyğalarğa nisbätle suverenlıq xoquqları häm iminlek borçularına xörmät kürsätüläre.

Törkiyä, üzeneñ ittifaq qısalarında burıçların ütäwçe äğ’za däwlät buluın assızıqlap, berlektäşlärenä terrorçılıq belän köräş häm gumanitar krizislarda êffektiv êşçänlek mäs’äläsendä xezmättäşlek täq’dimen qabatlayaçaq.   

İlbaşı Ärdoğan NATO ştabında uzaçaq sammitta qatnaşu öçen Bel’giyägä 13nçe iyün’dä yul totaçaq.