"Xalıqara cämäğat’çelekneñ yıllar buyı tawış çığarmawı Ärmänstanğa qıyulıq östi"

Törkiyä ilbaşı Räcäp Tayyip Ärdoğan Ärmänstannıñ, awır ciñelülärdän soñ, Törkiyäne dä bäreleş êçendä şikelle kürsätergä tırışuınıñ – poçmaqqa qısrıqlanu häm çarasızlıq dälile buluın äytte.

Ul Katarda ingliz telendä basıluçı “The Peninsula” gazetasına interv’yuda Azärbaycannıñ Ärmänstan tarafınnan basıp alınğan cirlären kire alu öçen köräşüe belän bäyle sorawlarğa cawap birde.

Ärdoğan Ärmänstannıñ Qarabaxta genośid qılğannan soñ yaqınça 30 yıldır Azärbaycan cirlären yawlap toruına basım yasadı.

“Bu küpläp üterü häm basıp alularğa qarşı xalıqara cämäğat’çelekneñ yıllar buyı tawış çığarmawı Ärmänstanğa qıyulıq östi. Ul agressiv adımnarın grajdanlılarğa qarşı yaña höcümnär belän däwam itä. Azärbaycan isä şunnan soñ basıp alınğan cirlären kire alu öçen xäräkätkä küçte häm xäzer Ärmänstannıñ yulbasarlıq belän qulında totqan töbäklärne ber-ber artlı kire ala,”-dip söyläde Törkiyä ilbaşı.

Ärdoğan Törkiyäneñ härwaqıt Azärbaycannıñ cir bötenlege mäs’äläsendäge  döres däğ’wasın yaqlayaçağın da äytte. Anıñça,  Qarabax problemasın çişü öçen BMO qararlarınıñ cirenä citkerelüe häm xalıqara xoquq quşqança êş itü kiräk.

Ärdoğan Ärmänstannıñ törek millätenä qarşı här forsatta agressiv häm doşmança qaraşın kürsätüen dä östäde. Ul älege däwlätneñ regionda tınıçlıq, totrıqlılıq häm xozurğa ireşüdä in zur kirtä buluına basım yasadı.