Törkiyä Kovid-19 vakśinasın İndoneziyada yasarğa cıyına

Törkiyä koronavirusqa qarşı vakśina proyektlarınıñ sınap qaraw häm yasap çığaru êtaplarında İndoneziya belän xezmättäşlek itäçäk. Bu xaqta sänäğat’ häm texnologiya ministrı Mostafa Varank belderde. Ul İndoneziyanıñ tikşerenü häm texnologiya ministrı Bambañ Brodjonegoro belän videoêlemtä aşa söyläşte.

Ministr Varank Törkiyä fänni häm texnologik tikşerenülär oyışması TÜBİTAKnıñ Kovid-19 platformasında alıp barılğan vakśina häm daru proyektlarınıñ qayberlärendä klinik täcribä êtabına kerülären belderde. Ul moña qadär uzğan yulnıñ qanäğat’länderüçe buluın assızıqladı.

Varank äytüençä, İndoneziyanıñ däwlät şirkäte Bio Farma - dön’yadağı sanawlı vakśina citeşterep çığaruçılarnıñ berse.

“Klinik fazadağı vakśinalarıbıznıñ häm keşelärdä sınaw, häm zur külämdä yasap çığaru mäs’älälärendä İndoneziya belän xezmättäşlek itüebez mömkin. Ähämiyätle yul üttek, bez täcribäbezne urtaqlaşırğa xäzer,”-dip söyläde Törkiyä ministrı.

Varank ilneñ milli xärbi oçqıçı turında da süz quzğattı. Ul aviaśiyä proyektlarında İndoneziyä belän xezmättäşlekkä äzer buluların äytte.

Ministr, şulay uq, 20 yıllıq xıyallarnı tormışqa aşırıp, Törkiyä ğaläm agentlığı tözülären xäterlätte. “Üz yasalma iyärçenebezne, töp komponentların da kertep, üzebez yasıy alabız. Bu ähämiyätle sälät,”-dide ul. Ministr İndoneziyanıñ ğalämgä oçırtu mäs’äläsendä uñay geografik urınğa iyä buluına iğ’tibarnı cälep itte.

“Ğalämgä ireşü bezneñ öçen kritik ähämiyätle. Biak utrawında İndoneziyanıñ bu tarmaqta başqa illär belän xezmättäşlek itüen beläbez, bez dä bu mäs’älädä xezmättäşlekkä äzer,”-dide Mostafa Varank.