Törkiyä Qıtayğa baruçılarnı kisätä

Törkiyäneñ Pekindağı ilçelege Qıtayda päyda bulğan yaña tör koronavirus turında kisätü yasadı. Anda ilneñ Vuxan şähärendä başlanğan kizüneñ başqa şähärlär häm däwlätlärgä cäyelüenä iğ’tibar cälep itelä.

Yaña virusnıñ üpkä yalqınsınuına kiterüe, yuğarı temperatura, yötkerü häm sulış aluda qıyınlıq şikelle bilgeläre buluı, sälamätlege naçar ölkännär häm immunitetı tübän keşelärgä tağın da citdi täêsir itüe belderelä. İlçelek Qıtayda yäşäwçe häm monda säyäxätkä kiläse töreklärgä şundıy kiñäşlär birä: xalıq törkemnärennän yıraq torırğa, açıq hawada saqlawçı bitlek kiyärgä, yuğarı temperaturalı, yötkerüçe häm sulış tarlığı kiçerüçe awırularğa yaqınlaşmasqa. Monnan tış, yötkergändä häm töçkergändä awız häm borınnı qaplaw häm qul’yawlıqnı yış almaştıru sorala. Kiñäşlär arasında canlı xaywannar bulğan ferma häm bazarlardan, alarnı çalu urınnarınnan yıraq toru, üle xaywannarğa yaqınlaşmaw, it, balıq häm yomırqa şikelle xaywannardan alınğan azıq-tölek häm balıqlarnı yaxşılap peşerü dä bar.

Belgeçlär qullarnı yış häm sabın belän yuarğa, säyäxät waqıtında yanda dezinfekśiyä gel’läre yörtergä kiñäş itä.