"Törkiyädä mondıyraq xäl bulsa, böten dön’ya ayaqqa basar ide”

Törkiyä tışqı êşlär ministrı Mäwlet Çavuşoğlu Anadolu agentlığınıñ Kahirädäge ofisına Misır poliśiyäseneñ basqın oyıştıruınıñ qabul itelmäs buluın citkerde. Ul ber telekanalğa interv’yusında tärtip saqçılarınıñ mäğ’lümat agentlığına tıqşınuları häm xezmätkärlärneñ qayberlären saq astına aluları turında söyläde. Ministr älege waqıyğanı yaqınnan küzätep baruların äytte.

“Monnan alda oxşaş bäylänülär, terror bulğan. Monıñ Anadolu agentlığında êşläwçe cirle keşelärgä qarşı buluın da küräbez. Ämma näticädä kemgä ikäne ähämiyätsez, Misır poliśiyäseneñ Anadolu agentlığında mondıy basqın yasawı qabul itelerlek tügel,”-di ul.

Törkiyä üzeneñ rizasızlığın belderülär arqılı citkerde. Şulay uq, Misırnıñ Änkaradağı diplomatın çaqırıp ta söyläştelär.

Çavuşoğlu äytüençä, misırlılarnıñ agressivlığı Törkiyä ilbaşınıñ Misırnıñ êlekkege däwlät başlığı Mursinıñ ülemen tikşerergä kiräklegen beldergännän soñ başlana. Älege ilgä Törkiyäneñ Liviyädä utnı tuqtatu mäs’äläsendäge tırışlıqları da oşamıy.

Törkiyä tışqı êşlär ministrı waqıyğağa matbuğat irege mäs’äläsendä bik sizger sanaluçı Könbatış däwlätläreneñ ällä-ni ise kitmäwenä borçıla."Törkiyädä mondıyraq xäl bulsa, böten dön’ya ayaqqa basar ide,”-di ul.