AQŞ yanawına - yanaw belän cawap
Törkiyä üz mäydanındağı Amerika xärbi bazaların kön tärtibenä çığarırğa äzer
AQŞ Törkiyägä qarşı sankśiyä qararı çığarsa, alarnıñ törek cirendäge ike xärbi bazası mäs’äläse kön üzägenä quyılırğa mömkin. Bu xaqta tışqı êşlär ministrı Mäwlet Çavuşoğlu belderde. Amerikanıñ Adanada İncirlik aviabazası häm Malatiyada Küräcik radiolokaśiyä noqtası bar.
Çavuşoğlu ber telekanalğa interv’yusında bäxäsle mäs’älä Rusiyädän satıp alğan S-400 hawa saqlanu sisteması belän F-35 xärbi oçqıçları arasında xoquqıy häm säyäsi bäyläneşlär bulmawın äytte. “AQŞ barlıq täq’dimnärebezgä “yuq” di. Basım belän ber cirgä barıp bulmayacağın añlarğa tiyeşlär,”-di ministr.
Çavuşoğlu AQŞ uñay qaraşta bulsa, Törkiyäneñ dä şulay bulaçağın assızıqladı. “S-400 höcüm sisteması tügel, saqlanu sisteması. F-35ne alu mömkin bulmasa, al’ternativalarnı qararğa mäcbürbez,”-dide ul.
Ministr AQŞnıñ Süriyädä qayber cirleklärne basıp alğan YPG/PKK belän mönäsäbätläreneñ däwam itüen dä äytte. “AQŞnıñ alarğa yärdäm itüe - cinayät’, xalıqara terrorçılıqnı finanslaw qısalarına kerä,”-dip söyläde Çavuşoğlu.
