Putin belän Ärdoğan ni turında söyläşäçäk?

İrtägä Törkiyä ilbaşı Räcäp Tayyip Ärdoğan häm Rusiyä däwlät başlığı Vladimir Putin Mäskäwdä oçraşaçaq. Kreml’ süzçese Dmitriy Peskov älege küreşü aldınnan qayber belderülär yasadı. Anıñ äytüençä, äñgämädä töp temalarnıñ berse - Süriyä bulaçaq.

“İdlibtäge wäzğıyät’ne küz uñında totqanda monı farazlaw awır tügel. Soçi kileşüläre nisbätennän Törkiyäneñ cawaplılıq alanındağı xäl kiskenlegen saqlıy. Putin Törkiyäneñ İdlib mäs’äläsendäge borçuların añlawın küp tapqırlar söyläde, ämma terrorçılarnıñ andağı êşçänleklärennän tınıçsızlıq ta däwam itä,”-dide Peskov.

Monnan tış, ul Törkiyä häm Rusiyäneñ bik üskän iq’tisadi häm säwdä mönäsäbätlärenä iyä buluın assızıqladı. İke däwlät arasında zur proyektlar häm ähämiyätle kileşülär tormışqa aşırıla.

“Bolar säyäsi mäydannardağı çaralar öçen nıqlı nigez barlıqqa kiterä. Bu nigezdä irtägä liderlar, älbättä, Süriyä, Ukraina häm başqa temalarnı da telgä alaçaq,”-di Kreml’ süzçese.  

 Peskov ike ilbaşınıñ irtägä Mäskäwdä MAKS-2019 xalıqara aviaśiyä häm ğaläm kürgäzmäseneñ açılışında qatnaşaçaqların da belderde.