Antarktikadan alınğan ürnäklärdä - yaña bakteriya

Törek ğalimnäre Antarktikadan kiterelgän ürnäklärne tikşergännän soñ yaña bakteriyä töre taptı. Ul awıl xucalığında kiñ qullanıluçı häm üsemleklärne yuqqa çığaruçı ximik matdälärne zararsız xälgä kiterä ala.

Şulay itep, Törkiyäneñ 3nçe milli Antarktika fänni êkspediśiyäsendä qatnaşqan ğalimänärneñ êşçänlege berençe cimeşlären birä başladı.

Yaña bakteriyä tören Untuğızınçı may universitetı fänni xezmätkäre Yılmaz Kaya citäkçelegendäge törkem tapqan. Alarğa ürnäklärne êkspediśiyädän Qara diñgez texnik universitetı professorı Ärsan Başar alıp qayta. Bu 50 törle su, boz, zäñgär häm yäşel suüsemnärneñ ürnäkläre.  

Yılmaz Kaya äytüençä, Untuğızınçı may universitetınıñ awıl xucalığı fakul’tetı bakteriologiyä laboratoriyäsendä qotıptan kiterelgän ürnäklärdän çista bakterial’ kul’turalar alınğan. Älege bakteriyälär belän täcribälär ütkärelä. Alarnıñ nindi gennarğa iyä buluların centekläp öyränälär.

Kaya açışnıñ tabiğat’neñ pıçranuına kirtä buluda ähämiyätle buluın assızıqladı. “Awıl xucalığında kiñ qullanıluçı, üsemleklärgä dä, tufraqqa da zarar birüçe gerbiśid isemle matdägä qarşı biologik agent bularaq bu bakteriyäne qullanırğa uylıybız. Şulay itep, älege mikroorganizmnıñ tabiğat’ pıçranuına kirtä nisbätennän ähämiyätle rol’ uynayaçağı küzallana,”-dide fän ähele.