"Süriyä kördlären PKK/PYD zolımına taşlap kitmäyäçäkbez"

Törkiyä ilbaşı Räcäp Tayyip Ärdoğan Süriyä kördlären separatist terrorçı oyışma YPG/PKKnıñ zolımına taşlap kitmäyäçägen belderde. Bu xaqta ul Bäştäpä Millät kongressı häm mädäniyät üzägendä yasağan çığışında söyläde. Anda ilbaşı Törkiyä Qorallı köçläreneñ Bäysez Süriyä armiyäse belän bergä Süriyäneñ tön’yağındağı YPG/PKK maqsatlarına bulaçaq operaśiyälärenä dä tuqtaldı. Ärdoğan äytüençä, bügen älege däwlättä kürsätelüçe zolımnıñ berdänber säbäbe - xalıqnıñ bülenep betüe. “Şunı uq Ğıyraq häm Yämän öçen dä äytep bula. Liviyä, Somali häm qanlı yäş’lär tügüçe başqa däwlätlär öçen äytergä mömkin. Säbäben üz êçebezdä êzlämäsäk - bu manzaranı üzgärtä almıybız. Bez ni öçen Süriyädä? Ğaräp qardäşlärebez, körd qardäşlärebezneñ bäysezlegen qaytaru öçen. Süriyä ğaräplären DEAŞnıñ qulına qaldırmağan şikelle, Süriyä kördlären dä PKK/PYD zolımına taşlap kitmäyäçäkbez,”-dip söyläde ilbaşı.

Ärdoğan Törkiyägä sıyınğan 4 million süriyäle arasında êtnik törlelek buluına basım yasadı. “Älegä qadär 300 meñgä yaqın süriyäle öyenä kire qayttı. Alar Törkiyä tarafınnan imin xälgä kiterelgän töbäklärgä genä kittelär. Ğıyraqtağı Sincar töbägen dä şul räweşle imin xälgä kiteräçäkbez. Süriyädä mäs’älä ğaräp, körd, törkmändä tügel, bäysezlektä. Mäs’älä - Süriyäneñ cir bötenlege,”-dide ilbaşı üz çığışında.