Törkiyä-Katar duslığı

İlbaşı Räcäp Tayyip Ärdoğan fikerençä, Törkiyä häm Katar üzläreneñ ber-bersenä awır könnärneñ dustı buluın qat-qat rasladı. İstanbulda Törkiyä-Katar yuğarı strategik komitetınıñ 4nçe cıyılışı ütte. Anda ike däwlätneñ dä liderı qatnaştı.

Ärdoğan cıyılışta çığış yasap: “Katarlı qardäşlärebez, ikençe öyegezgä xuş kildegez. Diplomatik mönäsäbätlärebezneñ 45 yıllığın qotlağan mondıy çorda xezmättäşlägebezneñ däräcäse öçen ğorurlıq toyabız,”-dide.

Ärdoğan “Çın dus awır waqıtta kürener” digän ğıybaräne iskä töşerde. Ul ike däwlätneñ awır çorlarda ber-berenä tayanuın häm bergäläşep xäräkät itüen assızıqladı.

“Törek milläte katarlı qardäşlärne maqsat itep alğan blokada häm sankśiyälärne yuqqa çığaru öçen küp tırışlıq quydı. Katar da 15nçe iyül’ tüntäreleşe kereşüennän soñ xalıqara mäydanda ilebezgä iñ köçle teläktäşlek kürsätkän däwlätlär arasında. Sonğı aylarda iq’tisadıbızğa yanağan spekulyativ omtılışlar waqıtında da yanıbızda ide. Şul nisbättän, tuğ’rı dustıbız Katarğa, kürsätkän köçle teräge häm tayanıçı öçen, tağın ber qat şäxsän häm xalıq isemennän räxmätlärebezne belderäm,”-dip söyläde Törkiyä ilbaşı.

Katar ämire Şäyex Tämim bin Hamäd Al Sani bu oçraşuğa şat buluın belderde häm ike aradağı mönäsäbätlärneñ däräcäsennän qanäğat’ buluın äytep uzdı.