Törkiyӓ-Ukraina şura cıyılışı uzdı

Törkiyä ilbaşı Räcäp Tayyip Ärdoğan Törkiyӓneñ Qırım tatarlarınıñ xaq hӓm mӓnfӓğatlӓren yaqlarğa dӓwam itterӓçӓgen ӓytte.

Törkiyӓ-Ukraina yuğarı dӓrӓcӓle strategik şura cıyılışınıñ 7nçese İstanbulda uzdı.

Cıyılıştan alda Ӓrdoğan belӓn Ukraina ilbaşı Petro Poroşenko İstanbuldağı Mabeyn sarayında üzara küreşep söylӓşte.

Matbuğatqa yabıq uzğan söylӓşüdӓ ike yaqlı hӓm regional’ mönӓsӓbӓtlӓr qaraldı.

Soñınnan şura cıyılışı ütkӓrelde. Utırışta ike ildӓn bӓylӓneşle ministrlar da qatnaştı.

Cıyılıştan soñ ike il arasında iqtisad hӓm saqlanu xezmӓttӓşlege kileşüe hӓm protokollar imzalandı.

İke lider soñınnan matbuğat oçraşuına küçte.

Ӓrdoğan irekle sӓwdӓ kileşüen yaña yılğa qadӓr tögӓllӓwdӓ tӓwӓkkӓl buluların assızıqladı.

Kön tӓrtibendӓ Qırım mӓs’ӓlӓse dӓ bar ide.

Törkiyӓ ilbaşı Ukraina cir bötenlegeneñ saqlanuı zarurlığın hӓm Qırımnıñ qanunsız yawlap alınuın tanımayaçaqların qabatladı.

Ukraina dӓwlӓt başlığı Poroşenko da Ukrainanıñ cir bötenlege belӓn Qırım mӓs’ӓlӓsendӓ kürsӓtkӓn xuplawı öçen Törkiyӓgӓ rӓxmӓten belderde.

Poroşenko irekle sӓwdӓ kileşüeneñ qısqa waqıtta tözelüe öçen kirӓkle boyırıqnı birülӓren dӓ citkerde.