"Ber tönne kötmägändä kilerbez"

Törkiyä ilbaşı Räcäp Tayyip Ärdoğan Süriyädä Färat yılğasınıñ könçığışına xäräkät signalı birde. Bu xaqta ul Törkiyä Böyek Millät Mäclesendä AK partiyäneñ törkem cıyılışında söyläde. Ärdoğan: “Süriyä mäs’äläsen çişmiçä kiläçägebezgä ışanıç belän qarıy almıybız,”-dide. Ul älege ildän yanawçı terrorçılıq höcümnäre häm başqa qurqınıçlarğa qarşı çaralar küräçäklären äytte. İlbaşı Süriyä krizisınıñ bu qadär faciğale xälgä kilüeneñ säbäbe itep xalıqara cämäğat’çelekneñ citärlek köç quymawın kürsätä.

“DEAŞnı, bilgele törkemnär tarafınnan qabat öyrätelgän häm töbäkkä cäyelderelgän äğ’zaları yärdämendä, äyterseñ, qabat tereltergä mataşalar. Töbäktäge maqsatlarına ireşü öçen ayırıp tormıyça barlıq terrorçılıq oyışmaların êtärgeç bularaq qullanuçı köç xäzer bu cirängeç uyının qabat säxnäläşterergä mataşa. Töbäktä yäşäwçelärneñ dä, dön’ya cämäğat’çelegeneñ dä bu DEAŞ uyınına ışanmayaçağın beläbez,”-dide Ärdoğan. Ul ber yaqtan Süriyä rejimın qotırtıp, ikençe yaqtan DEAŞnı ülemnän tereltep Süriyäne qabat qanğa häm utqa kümärgä mataşuçılarğa yul quymayaçaqların äytte.

Törkiyä ilbaşı Färat yılğasınıñ könçığışındağı terrorçılıq qorılışınıñ da tamırın qorıtaçaqların belderde. “Bu mäs’älä belän bäyle xäzerleklärebez, plannarıbız, programmalarıbıznı tämamladıq. Xätta uzğan könnärdä terrorçılıq oyışmasına yünältelgän xäräkätebezne başladıq. Tizdän tağın da kiñ külämle häm näticäle operaśiyälär belän terrorçılıq oyışmasınıñ tübäsenä barıp qunarbız. Ber tönne kötmägändä kilerbez,”-dide Ärdoğan.