Çavuşoğlu Lavrov belän küreşte
Alar Süriyä mäs'äläse häm ike yaqlı mönäsäbätlär xaqında söyläşte
Törkiyä tışqı êşlär ministrı Mävlüt Çavuşoğlu Rusiya Federaśiyäse başqalası Mäskäwdä xezmättäşe Sergey Lavrov belän küreşep söyläşte.
Söyläşüdän soñ ütkärelgän matbuğat oçraşuında Çavuşoğlu tübändägelärne citkerde:” Süriyädä utnı tuqtatunı däwam itterü öçen Rusiya belän êşçänleklärne dä däwam itterü zarur. İdlibtä xärbi çişeleş ,xärbi yul Süriyäneñ kiläçäge cähätennän fäläkät bulır. İdlibkä höcüm itü yöz meñnärçä keşeneñ ülüe, millionnarça keşeneñ yäşägän cirlären taşlap kitüe digän süz”.
Süriyädä säyäsi çişeleş öçen Töp Qanunnıñ mäcbüri buluın beldergän Çavuşoğlu Soçi formatındağı öç yaqlı liderlar sammitınıñ aldağı könnärdä İranda uzaçağın citkerde.
Rusiya belän mönäsäbätlärgä dä tuqtalğan Törkiyä tışqı êşlär ministrı süzlären tübändägeçä däwam itterde:“Mönäsäbätlärebezne här tarmaqta yuğarı däräcägä citkerü öçen zur tırışlıq quyabız. Bu yaqın duslıq qayber illärne könläştermi tügel. Rusiya bezneñ strategik partnyerıbız. Rusiyädän Törkiyägä kilüçe turist sanınıñ artuınnan qanäğät’bez. Bıyıl 6 million tiräse Rusiya turistın qunaq ittek”.
Rusiya Federaśiyäse tışqı êşlär ministrı Sergey Lavrov Süriyädä tınıçlıq häm totrıqlılıq urnaşuın teläwlären belderde.
Lavrov Törkiyä watandaşlarına viza mäs’äläsendä êşne ciñeläytü öçen urtaq kiñäşmä mexanizmı buldıru öçen kileşü täêmin itülären citkerde.
Törkiyä tışqı êşlär ministrı Mävlüt Çavuşoğlu Rusiya Federaśiyäse däwlät başlığı Vladimir Putin belän dä küreşäçäk.
Törkiyä saqlanu ministrı Hulusi Akar häm küzläw oyışması başlığı Hakan Fidan da Rusiyädä oçraşularda qatnaşa.
