Ärdoğan dollar belän bäyle belderü yasadı

İlbaşı Räcäp Tayyip Ärdoğan dollarnı törek lirasına almaştırırğa çaqırdı. Ul bügen Bayburtqa säfäre waqıtında valyuta kursındağı üzgäreşlärgä bäyä birep: “Dollar-mollar bezneñ yullarıbıznı kismäs, hiç borçılmağız. Mendär astında dollar, yevro, altını bulğannar bankka barıp anı törek lirasına almaştırsın. Bu milli, cirle köräş. Bu bezgä iq’tisadi suğış iğ’lan itüçelärgä millätemneñ cawabı bulaçaq,”-dip söyläde.  

Ärdoğan qayber illärneñ Törkiyä öçen möhim bulğan barlıq mäs’älälärdä qarşı tarafqa basuların belderde. Tüntäreleş yasawçılarnı yaqlıylar, terrorçılarnı qanatları astına alalar, xaq häm xoquq tanımawçı poziśiyädä toralar. “İq’tisadıbızda soñğı könnärdä bulğan tiskäre wäzğıyät’ tä bu vöcdansızlıqnıñ başqa ülçäme,”-di ilbaşı. Ul barlıq naçar ixtimallıqlarğa qarşı xäzerlek barlığın belderä.

“Valyuta kursına, prośentlarğa, yanawlarğa qarap uçların ışquçılar buşqa ömetlänmäsen. Törkiyäneñ makro iq’tisadi kürsätkeçlärdä, citeşterü köçendä, mäşğul’lek däräcäsendä, bank sistemasında keçkenä genä qıyınlığı bulmağan xäldä yasalma finans totrıqsızlıq dulqınnarına duçar bulabız. Bik ğadi berniçä fiker qarşılığı östendä qorılğan bu höcümnärneñ çın säbäpläre bötenläy başqa. Mondıy mönäsäbättä toruçı däwlätlär belän arabızdağı bäyläneşlär tözätep bulmaslıq zarar kürü noqtasına citte,”-dip söyläde Ärdoğan. Ul hiçber ilgä qarata şäxsi doşmanlıq bulmawın assızıqladı. “Barlıq däwlätlär belän mänfäğat’lärebez turı kilgändä xezmättäşlek itäbez, ayırılğan noqtalarda söyläşülär yulı belän xäl itärgä tırışabız. Ämma Törkiyäne poçmaqqa postırıp bağımsızlıq xaqlarıbıznı qısuğa kiterä torğan ber törkem taşlamalar yasatuğa barıp citsä - xäl üzgärer,”-dip däwam itte Ärdoğan. Ul tanktan, oçqıçtan, bombadan, yädrädän qurıqmağan xalıqnıñ mondıy yanawlardan qurıqmayaçağın belderde.