Awrupa Berlegennän teläktäşlek açıqlawı
Törkiyä belän yärdämläşü eçendä buluları belderelgän
Awrupa Berlege PKK terror oyışması Diyarbakır häm Mardindä aldağı könne oyıştırğan xain höcümnär qarşında Törkiyä belän teläktäşlek eçendä buluların beldergän.
Awrupa Berlege Komissiyasennän yasalğan yazulı açıqlawda Törkiyäneñ tağın ber qat Diyarbakır häm Mardindä terror höcümnärenä maqsat buluı belderelep, yaqtı dönyadan kitüçelär ğailäläreneñ qayğısı belän urtaqlaşılğan, yaralanuçılarğa şifalar telängän.
Açıqlawda: “Awrupa Berlege Törkiyä, xökümäte häm xalqı belän däwamlı yärdämläşüen qabatlıy. Törek räsmi zatları awırlıqlar belän oçraştı. Bolar arasında Awrupa Berlegeneñ terror oyışmaları isemlegendä urın aluçı PKKnıñ höcümnäre dä bar,” – dip äytelgän.
Diyarbakırnıñ Sur ilçäsendä poliśiya maşinasına separatist PKK terror oyışması äğzaläre tarafınnan bomba töyälgän transport çarası belän oyıştırılğan höcümdä ber ük ğailädän 5 keşeneñ ğomere özelgän, 5ese poliśiya xezmätkäre bulğan barlığı 12 keşe yaralanğan ide.
Mardinneñ Kızıltäpä ilçäsendä isä separatist PKK terror oyışması äğzaläre yulğa quyğan bomba töyälgän transport çarasın maxsus iminlek törkemnäre utırğan köbäle transport çarası uzğan waqıtta şartlatuı näticäsendä ber poliśiya xezmätkäre şähit buldı, 2 keşe yaqtı dönyadan kitte, 5ese poliśiya xezmätkäre bulğan barlığı 30 keşe dä yaralandı.
