İlbaşı Ärdoğan: “Xezmättäşlekne arttıru mäs’äläsendä kileştek”

Ärdoğan Rusiyä Federaśiyäse Däwlät başlığı Vladimir Putin belän Peterburgtağı oçraşuınnan soñ urtaq matbuğat konferenśiyäsen oyıştırdı.

Ärdoğan Rusiyä xezmättäşe belän ike yaqlı häm küp yaqlı xezmättäşlekneñ arttırıluı mäs’äläsendä kileşügä ireşülären belderep, êlemtälärneñ monnan soñ da här däräcädä tığız räweştä däwam itäçägen belderde.

İlbaşı “Akkuyu” atom-töş stanśiyäsenä strategik kapital salu statusınıñ bireläçägen, “Törek ağımı” kebek urtaq proyektlarnıñ da tizländereläçägen assızıqladı.

Rusiyä Däwlät başlığı Vladimir Putin da Törkiyä belän mönäsäbätlärneñ noyabr’ ayındağı oçqıç krizisınnan äwwälge torışına qaytuına östenlek birülären äytte.

Ärdoğan belän konstruktiv söyläşü uzdıruına iğtibarnı yünältüçe Rusiyä liderı urtaq möddätle ber programmanı tormışqa aşıru öçen kileşügä ireşülären belderde.

Xäzerge ênergetika proyektlarınıñ ğamälgä kertelüe öçen anıq säyäsi adımnarnıñ yasaluı zarurlığına basım yasawçı Putin säwdä xezmättäşlegeneñ iñ möhim öleşen şuşı ênergetika tarmağınıñ täşkil itüen assızıqlap äytep uzdı.

Törek şirkätlärenä qarağan çikläwlärneñ êtaplı räweştä betereläçägen dä äytüçe Vladimir Putin ike il qatnaş komissiyä söyläşüläreneñ däwam itäçägen dä belderde.

İke lider üzara küreşep söyläşüe waqıtında Süriyä krizisın da quzğattı.

Törkiyä İlbaşı Räcäp Tayyip Ärdoğan 15nçe iyül’ tüntäreleş kereşüennän soñ berençe çit il säfäre qısalarında sişämbe könne Rusiyä Federaśiyäsenä kitkän ide.

24nçe noyabr’dä Rusiyä oçqıçınıñ Törkiyäneñ hawa kiñlegen bozuı arqasında bärep töşerelüennän soñ Rusiyä lideri Vladimir Putin belän berençe qara-qarşı oçraşu buluı cähätennän dä ähämiyätle bulğan säfäre waqıtında İlbaşı Ärdoğan Konstantinovskiy sarayında cılı atmosferada qarşı alındı.

İke lider üzara häm wäkilleklärara söyläşülär aldınnan böten dönyada zur qızıqsınu belän kötelgän oçraşuları belän bäyle bularaq matbuğatqa qısqa ber belderü yasadı.

Putin, oçqıç krizisınnan soñ mönäsäbätlär äkrenäyep qalsa da 15nçe iyül’däge tüntäreleş kereşüennän soñ Ärdoğanğa berençe bulıp şaltıratuçılardan buluın belderep: "Bügen dä Rusiyägä xuş kildegez. İke yaqlı mönäsäbätlärebezne üzara küreşü öçen tudırğan şuşı forsat öçen räxmät äytäm”, - dip belderde.

İlbaşı Ärdoğan isä ike il arasında nigezdä uñay barışqa kergän mönäsäbätlärneñ yasalaçaq yaña adımnar belän tağın da üzgä ber êtapqa küçäçägen äytte.

15nçe iyül’dä Putinnıñ şaltıratuına şat buluın assızıqlawçı Ärdoğan biredäge oçraşu belän töbäktäge problemalarnıñ xäl itelüenä dä yärdäm iteläçägen belderde.

Ärdoğan: "Töbäkneñ säyäsi bularaq bezdän kötkännäre bar”, - dip östäp äytep uzdı.