İlbaşı xalıqqa möräcäğat itte

Törkiyä ilbaşı Räcäp Tayyip Ärdoğan 15nçe iyul könge tüntäreleş kereşüeneñ xökümät, millät häm Törek qorallı köçlärne maqsat itep aluın äytte.

Ärdoğan xain kiçtän bügengä qadär uramnardan kitmägän millionnarça watandaşqa möräcäğat itte.

Törkiyä ilbaşı: “15nçe iyul könne qorallı kereşüne imanı belän bastırğan ğaziz millätem! Watandaşlarıbızğa häm xainlärne kire çigendergän iminlek köçlärenä räxmätemne belderäm,” – dide.

Mäydannarda uñçı-sulçı, ğaläwi-sönni tügel, ä Azatlıq suğışında bulğanı kebek bar Törkiyäneñ, bar millätneñ bukuın assızıqlağan Ärdoğan kiläçäge, xoquq häm irekläre, demokratiya yanında buluları öçen härkemgä räxmäten belderde.

Aziyadan alıp Afrikağa qadär xuplawların citkergän barlıq illärgä räxmäten belderep, waqiğa barlıqqa kilgän könne şähit buluçılarğa Allahtan yarlıqaw, yaralanuçılarğa şifalar telägän ilbaşı çit illärdäge watandaş/qawemdäşlärneñ xuplawınıñ onıtılmas buluın citkerde.

Törkiyä watandaşların bombağa totqan xainlärgä kiräkle cäzanı biräçäk ködrättä buluın assızıqlağan Ärdoğan: “Operatsiya uñışlı räweştä däwam itä. İrtägä Törkiyä bügengedän tağın da köçle bulaçaq,” – dide.

Operatsiyalärdäge soñğı sannarnı da äytkän ilbaşı barlığı 13 meñ 165 keşeneñ saq astında buluın, 123e general bulğan 5 meñ 863 keşeneñ dä qulğa alınuın citkerde.

Ğadättän tış xäl häm annan soñ yasalğan adımnarnı añlatqan Ärdoğan saq astı waqıtınıñ 4 könnän 1 ayğa çığarıluın, Fätullahçı terror oyışması äğzase bulğan däwlät xezmätkärläreneñ eştän çığarıluın, mäktäplär, tulay toraq, sälamätlek saqlaw oyışması, hönärçelär berlegeneñ yabıluın, mal-mölkätläreneñ tartıp alınuın belderde.

Törkiyä ilbaşı däwlät eşennän çığarıluçılarnıñ başqa däwlät xezmätkäre bula almayaçaqlarına da basım yasadı.