“Sıyınuçılarğa sarıf itelgän aqça bezneñ öçen qazanış”

Törkiyä ilbaşı Räcäp Tayyip Ärdoğan sıyınuçılarğa 6 yıl buyı sarıf itelgän 10 milliard dollarnıñ Törkiyä öçen yuğaltu tügel, qazanış buluın belderde.

İlbaşı İstanbul Haliç kongress üzägendä ütkärelgän Möstäqil sänäğätçe häm eşmäkärlär cämiyäteneñ traditsion iftar aşında çığış yasadı.

Ardoğan Ğiraqta, Süriyädä,Fälästindä ,Myanmada här kön gönahsız keşelärneñ üterelüen yäisä alarnıñ cäberlänüen assızıqlap, yäşägän cirlärennän qaçıp kitkän millionnarça möselmannıñ törle illärdä bik awır şartlarda yäşäwenä basım yasadı.

Urta diñgezneñ zur ömetlär bağlap yulğa çıqqan yözlärçä qaçaq öçen här kön ziratqa äwerelä baruın belderüçe Törkiyä ilbaşı süzen tübändägeça däwam itterde:” Afrikada awız açu öçen eçärgä yaraqlı çista su, ber telem ikmäk taba almawçılar bar. Bäräkät urtaqları artqan sayın tağın da kübäyä. Ramazan ayın bu añlayış belän kiçerü barıbız öçen dä qazanış bulaçaq. Bezneñ dönyadağı ber genä qıyın xäldä, zolım kürgän keşegä qarata iğtibarsız qalu xaqıbız yuq. Tirä-yağıbızdan başlap ilebezdäge barlıq moxtaclar belän bergä, süriyäle häm ğiraqlı sıyınuçılarnı da qayğırtabız. Alar bezgä ämanät itelgän möhacirlär. Möstäqil sänäğätçe häm eşmäkärlar cämğiyäte äğzası bulğan barlıq eşmäkärlärneñ alarğa yärdäm itüenä ışanam”.

Törkiyädä sıyınuçılarnıñ ber öleşen çatırlarğa, ber öleşen konteynerlarğa urnaştıruların belderüçe Törkiyä ilbaşı Räcäp Tayyip Ärdoğan nigezdä barlıq sıyınuçılarnı konteynerlarda yäşätergä teläwlären häm monıñ Törkiyä öçen qazanış bulacağın citkerde.