Törkiyä Azärbaycannıñ qayğısın urtaqlaştı

Ärmänstan-Azärbaycan front sızığında kilep çıqqan bäreleşlärdä 12 azärbaycan ğäskäriyeneñ şähit itelüe arqasında qärdäş ilneñ qayğısın urtaqlaşuçı berençe il Törkiyä buldı.

İlbaşı Räcäp Tayyip Ärdoğan telefon aşa xezmättäşe İlham Aliyevneñ qayğısın urtaqlaştı.

İlbaşı Ärdoğan törek xalqı isemennän şähit azärbaycan xärbiläre öçen Allahtan yarlıqaw, yaralanuçılarğa aşığıç şifalar teläde.

Azärbaycanğa yaqlawnıñ däwam iteläçägen belderüçe Törkiyä İlbaşı bäreleşlärne tuqtata almağan Amerika Quşma Ştatları, Rusiyä Federatsiyäse häm Frantsiyadan torğan Minsk öç yaqlı törkemen gäyepläde.

Minsk öç yaqlı törkemeneñ bäreleşlärgä ciñelçä qarawnıñ bu küreneşne tudıruına basım yasawçı Ärdoğan: "Ägär Minsk öçlese biredä ğadel täwäkkäl räweştä näticä aluçı adımnarnı yasağan bulsa ide, şuşı könnärgä kilep citmägän bulır idek", - dip äytte.

Azärbaycan Däwlät başlığı Aliyev ta yaqlaw häm teläktäşlek öçen İlbaşı Ärdoğan häm törek xalqına räxmätlären belderde.

Ärmänstan-Azärbaycan tartqalaşuı häm Yuğarı Qarabax mäs'äläseneñ xäl itelüendä Törkiyäneñ härwaqıt Azärbaycanğa kürsätkän yärdäm öçen räxmät burıçlı buluların assızıqlawçı İlham Aliyev törek xalqına ixtiramın citkerde.

Premyer-ministr Äxmät Dawıtoğlu da, Azärbaycan İlbaşı Aliyevqa şaltıratıp, qayğıların urtaqlaştı.

Aliyev söyläşü waqıtında Premyer-ministr Dawıtoğluna Azärbaycan ğäskäreneñ Ärmänstan provokatsiyäsen täwäkkällek belän totqarlawın häm kiräkle cawapnı birüen assızıqladı.

Dawıtoğlu da Ärmänstan provokatsiyäseneñ totqarlanuı arqasında täbriklären häm yaqlawın citkerde.

Tışqı eşlär ministrı Mäwlüt Çavuşoğlu da, Azärbaycan xezmättäşe Älmar Mämmädyarovqa şaltıratıp, Ärmänstan belän çik buyında kilep çıqqan bäreleşlärdä şähit bulğan Azärbaycan xärbiläre öçen qayğıları belän urtaqlaştı.

Törkiyä tışqı eşlär ministrlığınnan yasalğan belderüdä dä Ärmänstan yağınnan Azärbaycanğa qarşı başlatılğan artilleriya utın häm tınıç xalıqqa da tä'sir itkän höcümnär gäyeplänep:"Ärmänstannı utnı tuqtatırğa, bäreleşlärne beterergä çaqırabız", - dip äytelde.

Belderüdä: "Yuğarı Qarabax tartqalaşuınıñ xäl itelüe öçen oyıştırılğan Awrupa iminlek häm xezmättäşlek oyışmasınıñ Minsk törkemeneñ ber äğzase bulğan Törkiyä / tartqalaşuğa Azärbaycannıñ cir bötenlege häm möstäqillege qısalarında ğadel häm daimi çişeleş tabıluı tırışuların yaqlarğa däwam itäçäk", - dip äytelde.