"3 ilneñ cir bötenlegenä Rusiya qurqınıçı yanıy"

Ber könlek eş säfäre belän Ukrainağa kitkän Törkiyä premyer - ministrı Äxmät Dawıtoğlu Kiyevtä xezmättäşe Arseniy Yatsenyuk belän küreşep söyläşkännän soñ urtaq matbuğat oçraşuı ütkärelde.

Dawıtoğlu Yatsenyuk belän oçraşu däwam itkändä Rusiyäneñ Süriyäneñ Azäz ilçäsendä mäktäp häm xastaxänäne bombalawın , tınıç xalıqtan küp sanda keşeneñ ğomere özelüen belderde.

Äxmät Dawıtoğlu Süriyä rejimınıñ ,anı yaqlawçı Rusiyäneñ ,başqa illärneñ, “YPG”häm başqa terror oyışmalarınıñ Süriyädä keşelek cinayäte başqaruğa säbäp buluların citkerde.

Dawıtoğlu süzen tübädägeçä däwam itterde:”Bügenge köndä 3 ilneñ cir bötenlegenä Rusiya qurqınıçı yanıy. Bolar:Gruziya, Ukraina häm Süriyä. Mäskäw Ärmänstanğa yaqlaw kürsätkängä kürä Azärbaycannıñ cir bötenlege dä fakt bularaq Rusiya yanawı astında”,-dide.

Ukrainanıñ cir bötenlege häm möstäqillegeneñ Törkiyä öçen iñ töp printsiplardan berse buluına basım yasawçı premyer-ministr Dawıtoğlu :”Monıñ öçen Qırımnı Ukrainanıñ ber öleşe bularaq qabul itäbez. Ayıruça Sovetlar Berlege çorında mixnätlär kürgän Qırım mäs'äläsendä Ukraianağa teläktäşlek belderäbez”,-dide.

Ukraina premyer-ministrı Arseniy Yatsenyuk ileneñ cir bötenlege häm bäysezlegen yaqlağan ,Rusiyäneñ agressivlığı qarşında alıp barılğan köräştä Donetsk häm Lugansknı Ukraina cirläre itep sanağan öçen Törkiyägä räxmätlären belderde.

İqtisad tarmağında ike il arasındağı mönäsäbätlärneñ bik yaxşı däräcädä buluın belderüçe Ukraina premyer-ministrı Yatsenyuk İrekle säwdä kileşüeneñ kön tärtibendäge iñ möhim mäs'älä buluın assızıqladı.

Törkiyä-Ukraina arasındağı xalıqara kileşülärgä qul quyu tantanasında meditsina tarmağına aqça bağışlaw kileşüenä Törkiyä sälamätlek saqlaw ministrlığı kiñäşçese Äyüp Gümüş häm Ukrainanıñ Törkiyädäge tulı wäqalätle ilçese Sergey Korsunsky qul quydı.

İke il iqtisad ministrları isä Ukrainağa kredit birü xaqındağı kileşüne imzaladı.