Törkiyädä sälamätlek häm turizm 50

Urta diňgez yar buyındağı Antalya şähäre – Törkiyäneň iň matur şähärlärennän berseder. Anıň turında “Urta diňgez encese” dip äytüçe dä bar, “Törek revyerası”, “Ciryöze cännäte” dä. Niçek dip atasağız da, Antalya turistik cähattän Törkiyäneň tanılğan, yaxşı belenüçe häm iň küp turist cälep itüçe vilayätlärdän berse bulıp tora. 2013nçe yılda qabul itkän 11 million 120 meň 730 çit il turist sanı belän monnan alda bulğanı kebek 2013tä dä berençe urınnı berkemgä dä birmäde.

Antalyanıň ni öçen härwaqıt berençe buluın aňlaw awır tügel. Şaqtıy borınğı şähär häm tarixi äsär urın alğan Antalya çaqrımnarğa suzılğan yar buyı, yomşaq klimatı häm ozın turizm sezonı belän tawları, urmannarı belän bay turizm törlelegenä iyä.

Antalya sälamätlek saqlaw turizmı mäs’äläsendä dä Törkiyäneň üzenä cälep itüçe üzäklärennän berse bulıp tora. Ber yaqtan däwalanğan waqıtta ikençe yaqtan yaxşı yal itärgä teläwçelär öçen Antalya menä digän urın. Anıň bu potentsialın kürep alğan cirle citäkçelär häm sälamätlek saqlaw turizmı investorları Antalyanı bu ölkädä tağın da üsterergä tırışa.

Antalyanıň zäp-zäňgär diňgeze, altın qomnarı, yäm-yäşel urmannarı qadär güzäl, läkin bik belenmäwçe tabiğıy güzälleklärdän berse dä – şarlawıqlarıdır. Toros tawlarınıň könyağındağı çığanaqlardan çığuçı ağımsular uzğan urınnarda häm diňgezgä quşılğanda iskitkeç manzara barlıqqa kiterä. Vilayät çikläre eçendä 20dän artıq şarlawıqnıň buluına qaramastan alarnıň eçendä iň güzälläre – Manavgat, Düdän häm Kurşunlu şarlawıqları.

“Manavgat şarlawığı” Antalya yulında häm Antalyağa 80 çaqrım yıraqlıqta urnaşqan. Här yıl fasılında suğa bay bulğan Manavgat çayı östendä berse olı ikençese keçkenä bulğan 2 şarlawıq bar. Manavgat ilçäseneň 4 çaqrım tönyağındağı Böyek Şarlawıqnıň tirä-yağı bizälep, parka äyländerelgän. Tamırları häm botaqları suğa tiyep toruçı çınar ağaçları külägäsendäge bu alanda qatı qatlamnardan tizlek belän qoyıluçı sunı qarıy alasız, su tawışların yaqında urın alğan restoran, terrasa, çäy baqçalarında işetep bula. Cäy köne xäl alır, yal itä öçen dä ideal’ urın.

Düdän şarlawığı Antalyanıň sixerle şarlawıqlarınnan ikençese bulıp tora. Manavgat şarlawığı kebe kul da ike urınnan asqa taba qoyıla, Yuğarı Düdän häm Tübän Düdän. Antalyağa 10 çaqrım yıraqlıqta urın alğan Yuğarı Düdän şaqlawığı çınnan da tabiğat moğcizasıdır. 10 metr biyeklektän qoyıluçı sunıň tirä-yağı çormawıqlar belän äylänep alınğan. Monda üzegezne yaňğır urmannarında kebek xis itä alasız. 1992nçe yılda tıyulıq itep iğlan itelgän şarlawıq yanında piknik häm yal itü urınnarı yasalğan.

Düdän yılğası Yuğarı Düdän şarlawığınnan 10 çaqrım yuldan soň Urta diňgez belän kiseşä. Tübän Düdän dip atalğan bu şarlawıqta su 40 çaqrım biyeklektän diňgezgä qoyıla. Monda sunıň bolıt räweşendä diňgezgä qabat qoyıluı çınnan da bik matur manzaranı barlıqqa kiterä.

Antalyanıň öçençe zur şarlawığı isä - Kurşunlu şarlawığıdır. Antalyağa 24 çaqrım yıraqlıqta naratlar arasında urın ala. 1986nçı yılda qabat tärtipkä salınıp, 17 gektarlık zur parka äyländerelgän şarlawıqnıň tirä-yağı. Şähärneň ığı-zığısınnan yıraqlaşırğa, beraz xozur tabarğa telisez ikän, bay üsemlek dönyası, piknik alannarı häm yörü yulları belän Kurşunlu tabiğat parkı näq sezgä kürä. 18 metr biyeklektän qoyıluçı Kurşunlu şarlawığı belän ber rättän üzänlek buyınça ağuçı yılğada da küp sandağı şaqrlawıq bar. Şarlawıqlar qoyılğan urınnarda barlıqqa kilgän keçkenä küllärdä tönboyıqlar belän balıqlar bergä yözä. Yägni şarlawıqnı ğına tügel, ä bu matur parknı gizü yäisä piknik yasaw, tabiğat qoçağında berniçä säğat uzdıru, yal itü öçen menä digän urındır Kurşunlu şarlawığı.