Azärbaycan Franśiyägä qanäğat'sezlegen belderde

Azärbaycan Franśiyä säyäsätçeläreneñ tiskäre mönäsäbäte säbäple älege ilneñ Baqı ilçese Ênn Buayonnı tışqı êşlär ministrlığına çaqırdı.

Räsmi çığanaqlar beldergänçä, Franśiyäneñ törle säyäsi dairäläre Azärbaycanğa yala yağu häm nigezsez ğayepläwlär kampaniyäsen tağın da kiñäytep däwam itä. Azärbaycan monnan qanäğat’sezlegen ilçe Buayonğa citkerde häm aña protest yazması birelde.   

Tışqı êşlär ministrlığınnan yasalğan belderüdä berniçä kön êlek Franśiyä parlamentında wäkillek itüçe säyäsi köçlärneñ liderları isemennän Franśiyä ilbaşı Êmmanuêl’ Makronğa isemlengän ber xat birelüe äytelä. Anda Azärbaycanğa qarata nigezsez ğayepläwlär, farazlar häm ilneñ suverenlığı belän cir bötenlegenä höcüm däräcäsendäge adımnar yasawğa çaqıru yata.

Buayon belän söyläşkän ministrlıq wäqalätleläre Azärbaycanğa qarşı kampaniyäne kiçekmästän tuqtatu maqsatınnan Franśiyä xökümäteneñ kiräkle çaralarnı kürüen taläp itte.