BMO Azärbaycan belän Ärmänstanğa çaqıru yasadı

BMO ğomum särqatibe Antonio Guterriş Azärbaycan belän Ärmänstan arasındağı problemanı söyläşü yulı belän çişärgä çaqırdı. Bu xaqta anıñ süzçese Stefan Dyujarrik matbuğat cıyılışında söyläde. Ul ğomum särqatibneñ Ärmänstan belän Azärbaycan arasındağı Qarabax töbägendä soñğı kiyerenkelekne borçılıp küzätüen äytte.

“Ğomum särqatib ike yaqnı da totnaqlıq kürästergä häm aralarındağı çişelmägän problemalarnı söyläşü yulı belän xäl itärgä çaqıra,”-dide Dyujarrik.

Azärbaycan saqlanu ministrlığı aldağı könne Qarabax töbägendä qanunsız ärmän köçlärenä qarşı operaśiyä başlawın belderde. Alarnıñ Rusiyä kontrole astındağı cirleklärdä terrorçılıq häm sabotaj ğamälläre qıluı häm näticädä Azärbaycan armiyäseneñ ber ğaskäriye hälaq buluı citkerelde.

İsegezgä töşeräbez, 2020nçe yılnıñ 27nçe sentyabrendä Ärmänstan armiyäseneñ toraq punktlarğa höcümnärennän soñ Azärbaycan, Qarabax töbägendä basıp alınğan cirlären qotqaru öçen, operaśiyä başladı.

44 kön däwam itkän köçle bäreleşlärdän soñ Rusiyä 2020nçe yılnıñ 10nçı noyabrendä Azärbaycan belän Ärmänstannıñ utnı tuqtatu turında kileşüen, Baqınıñ yawlanğan rayonnarın qabat üz kontrolenä aluın xäbär itte