Tağın 8 uyğırğa ülem cäzası

Qıtaynıñ Uyğır üzidaräle töbäge başqalası Öremçedäge xalıq mäxkämäse 2 qanlı höcüm belän bäyle 8 uyğırnı ülem cäzasına , 5 ğayeplänüçene kiçekterelgän ülem cäzasına , 4 keşene isä törmä cäzasına xökem itkän.

Qıtay däwlät televideniyese beldergänçä, aprel häm may aylarında pıçaq häm şartlatqıçlar qullanıp oyıştırılğan höcümnärdä 46 keşe ülgän, 200 gä yaqın keşe yaralanğan bula.

Töbäktä soñğı 2 yılda küzätelgän qırıslıq waqiğalarında 200 keşeneñ hälaq buluı belderelgän.

Soñğı cäzalar Qıtay citäkçelegeneñ Uyğır üzidaräle töbägenä qarata alıp barğan iminlek säyäsäteneñ däwamı itep bäyälänä.

Pekin waqiğalardan separatist dip beldergän törkemnärne cawaplı totqanda , keşe xoquqların yaqlawçılar isä waqiğalarda Qıtaynıñ mädäni häm dini basım säyäsätläreneñ tä’sirle buluın däğwa itä.