Naxçıvanda saqlanu ministrları cıyılışı

Naxçıvan xärbi ştabında ütkärelgän cıyılışta Törkiyä milli saqlanu ministrı İsmät Yılmaz, Azärbaycan saqlanu ministrı Zakir Xasanov häm Görcestan (Gruziya) saqlanu ministrı İraki Alasaniya qatnaştı.

Başta ministrlar oçraştı, annan soñ wäkilleklär arasında söyläşülär ütkärelde.

Saqlanu ministrları soñınnan matbuğat oçraşuın oyıştırdı.

Törkiyä saqlanu ministrı İsmät Yılmaz yasağan çığışında Qavqazda tınıçlıq şartlarınıñ urnaştırıluı häm däwamı öçen öç ilneñ dä urtaq xäräkät itäçägen belderde.

"Törkiyä bularaq Azärbaycan häm Görcestan-Gruziyanıñ cir bötenlegen yaqlıybız”, - dip äytüçe ministr Yılmaz Qarabax mäs’äläseneñ cir bötenlege qısalarında häm kileşü yaqlı yullar belän xäl itelä alınaçağın äytte.

Cıyılışnıñ kön tärtibendä soñğı yıllarda tormışqa aşırılğan däw energetika häm transport proyektları da bar ide.

Ministr Yılmaz qayberäwläre öçen xıyal bulğan Baqı-Tbilisi-Cäyhan neft ütkärgeçe häm Baqı-Tbilisi-Ärzurum tabiği gaz ütkärgeçe proyektlarınıñ tögällänüen, TANAP (Trans Anadolu tabiği gaz ütkärgeçe) häm Baqı-Tbilisi-Kars timer yulı proyektlarınıñ da bik yaqın waqıtta tämamlanaçağın äytte.

Söyläşülär waqıtında bu däw proyektlarnıñ iminlegeneñ tä’min itelüe mäs’äläse quzğatıldı.

Törkiyä, Azärbaycan häm Görcestan (Gruziya) arasında saqlanu ölkäsendä xezmättäşlekneñ üsterelüe öçen dä här altı ayda ber tapqır öç saqlanu ministrı qatnaşuında cıyılışlar uzdırılaçaq.