Törek matbuğatına küzätü 26.09.2023

“Xäbär Türk” gazetı Törkiyä ilbaşı Ärdoğannıñ süzläre belän  “Operaśiyäneñ uñışı-ğorurlıq” dip yaza. İlbaşı Räcäp Tayyip Ärdoğan Azärbaycannıñ legal’ häm xaqlı borçılularında ärmännärdän kiräkle cawapnı taba almawın äytte. “Azärbaycan üz suveren cirlärendä terrorçılıqqa qarşı operaśiya ütkärergä duçar buldı. Operaśiyäne uñışlı tämamlaw – ğorurlıq”,- dide ul.

"Sabah” gazetı “Naxçıvanda tarixi proyektlarğa nigez salındı” dip xäbär itä. Törkiyä ilbaşı Räcäp Tayyip Ärdoğan häm Azärbaycan ilbaşı İlham Äliyev Iğdır-Naxçıvan tabiği gazütkärgeçenä nigez saldılar. “Proyekt Azärbaycan belän ênergiya ölkäsendäge partnyerlığıbıznı tağın da tiränäytäçäk häm şulay uq Awrupanıñ ênergiya belän täêmin itü qurqınıçsızlığına yärdäm itäçäk”,- dide ilbaşı Ärdoğan.

”Star” gazetı ”Makronğa qatlawlı soraw” isemle yazmasında citkergänçä, Azärbaycan tışqı êşlär ministrlığı süzçese Ayxan Xacızadä Franśiya ilbaşı Êmmanuêl’ Makronnıñ Ärmänstannı yaqlaw, Azärbaycannı ğayepläw süzlärenä reakśiya belderde. “30 yıl däwamında xoquqları bozılğan, üz cirlärennän quılğan häm küpläp üterülärgä duçar bulğan azärbaycanlılarnıñ xoquqları turında bernindi süz äytmägän Franśiyäneñ xäzer ärmännär xoquqların yaqlawı yaxşı niyätle bulmawın kürsätä”,- dide Ayxan Xacızadä.

“Watan” gazetı “Awrupa Berlegendä “Törkiyä belän kileşik” çaqıruı” isemle xäbärendä yazğança, tärtipsez qaçaqlar ağımınıñ artuı Awrupa Berlege illäre arasında kiyerenkelekneñ köçäyüenä kiterä. Küpçelek Awrupa illärendäge sıyınu üzäklärendä urın qalmadı, Awrupa başqalaları cawaplılıqnı büleşü öçen urtaq çişeleş tabuda qıyınlıqlar kiçerä. Greśiya migraśiya häm sıyınu ministrı Dimitris Keridis Awrupa Berlegen Törkiyä belän kileşergä öndäde.  

“Yäni Şafak” gazetı “İnvestorlar törek lirasına yünäldelär” dip citkerä.

Törek lirası depozitlarınıñ öleşen arttırunı küzdä totqan reglamenttan soñ investorlar qabat törek lirasına yünäldelär. Äydäp baruçı kürsätkeçlär cirle häm çit il investorlarınıñ portfoliolarında Törkiyä lirası aktivlarınıñ öleşen arttıra başlawın äytüçe Üzäk bank başlığı Xafizä Gayä Ärkan “Törek lirası aktivlarına taläpne arttıruda qararıbız qatğıy” dide.