Törek matbuğatına küzätü 22.09.2023

“Yäni Şafak” gazetı yazğança, Törkiyä ilbaşı Räcäp Tayyip Ärdoğan AQŞqa säfäre azağında N’yu-Yorktağı "Törek yortı"nda (Нью-Йорктагы “Төрек йорты”нда) jurnalistlarğa açıqlaw yasap, BMO Ğomum şurasında yasağan yullamalarnıñ häm reforma çaqıruınıñ bar dönyada yañğıraş tabuı belän bäyle bularaq bolay dide: “Bez barlıq tribunalarda çınbarlıqnı häm döreslekne añlattıq, xaq-xoquqnı yaqladıq. BMO Ğomum şurasında äytelgän här cömläne millätebezneñ yünäleşe belän qordıq.”

“Star” basması beldergänçä, Milli saqlanu ministrlığınıñ Matbuğat häm cämäğat’çelek beläñ êlemtä kiñäşçese, kontradmiral Zeki Aktürk kiçä ministrlıkta oyıştırılğan atnalıq matbuğat cıyılışında tübändägeçä citkerde: “Ğıyraq häm Süriyäneñ tön’yağı belän soñğı ber atnada 42 terrorçı täêsirsez xälgä kiterelde. Şul räweşle täêsirsez xälgä kiterelgän terrorçı sanı 1nçe ğıynwardan başlap 1271 buldı, 2015 yılnıñ 24 iyul’könennän bügengä qadär isä 38 614kä citte.”

“Sabah” gazetı xabärenä kürä, Awıl häm urman xucalığı ministrı İbrahim Yumaklı kiçä belderü yasap, Törkiyäneñ ağaç utırtu êşlärendä Awrupada berençe, dönyada isä dürtençe urında buluın äytte.

“Xörriyät” basması citkergänçä, Törek hawa yulları aviaŝiya tarmağınıñ aldınğı oyışmalarınnan bulğan APEX tarafınnan öçençe tapqır “World Class” bülägenä layıq buldı.

“Watan” gazetı yazğança, Antaliyada turizm sezonı ayıruça Könbatış Awrupa illärennän yasalğan rezervaŝiyalär belän bergä noyabr’ ayı urtalarına qadär suzıldı. Sentäbr’neñ berençe atnasında şähärgä 11 million 350 meñ turist kilde. Ay azağında bu sannıñ 12 million buluın kötkän tarmaq wäkilläre oktäbr’ rezervaŝiyaläreneñ dä bik yaxşı buluın açıqladı.