Törek matbuğatına küzätü 22.06.2023

“Star” gazetı “Energy Intelligence”tan iğ’tibarnı cälep itüçe analiz” isemle yazmasında citkergänçä, Amerika Quşma Ştatlarındağı “Energy Intelligence” 14 häm 28 nçe maylardağı saylawlarnı küzdä totıp Türkiyä ilbaşı Räcäp Tayyip Ärdoğannıñ ciñüe turında mäqalä yazdı. Türkiyäneñ bäysez tışqı säyäsät alıp baruına iğ’tibar cälep itelgän mäqalädä “Ärdoğan idarä itkän waqıtta Awrupa häm AQŞ mänfäğat’lärennän bäysez häm üz yünäleşe belän barğan Türkiyä tışqı säyäsäten buldırdı” digän yullar urın aldı.

“Yeni Şafak” gazetı “Türkiyä, Rusiya häm İran “YPG/PKK” nı yaqlawçı illärne ğayeplädelär” dip yaza. Kiçä Qazaqstan başqalasında Astana söyläşüläreneñ 20 nçe turı ütte. Oçraşu axırında Rusiya, Türkiyä, İran urtaq belderge qabul ittelär häm Süriyäneñ tön’yaq-könçığışında “PKK/YPG” nı yaqlawçı illärneñ ğamällären ğayeplädelär.  

“Sabah” gazetı “Ministr Uraloğlu datanı äytte” isemle xäbärendä yazğança, Türkiyä transport häm asqorma ministrı Abdulqadir Uraloğlu “Maqsatıbız – milli tiz yöreşle poyezdnıñ 2025 nçe yılda yulçı yörtergä kereşüe” dip äytte.

“Hürriyet” gazetı “Antaliyada yaña rekord quyıldı” dip xäbär itä. 17 nçe iyün’dä Antaliyağa oçqıç belän kilgän turist häm reys sanında yaña rekord quyıldı. Uzğan şimbädä biregä 1 meñ 81 oçqıç häm 86 meñ 278 keşe kilde.

“Vatan” gazetı “Diñgez äkäm-tökäme êksportı 7,2 million dollardan arttı” isemle xäbärendä citkergänçä, Türkiyä bıyılnıñ ğıynwar-may aylarında 7 million 235 meñ 437 dollar külämendä diñgez äkäm-tökäme êksportladı. Bu isä uzğan yılnıñ şul uq çorı belän çağıştırğanda 159%qa kübräk. İñ küp êksport başqarılğan il – Kön’yaq Koreya.