Törek matbuğatına küzätü 20.04.2023
Qayber törek basmalarına küzätü
“Vatan” gazetı yazğança Greŝiyaneñ iñ zur gazetlarınnan bulğan “Kathimerini” “Türkiyä atom-töş köçkä äylänä” isemle xäbärendä Törkiyä ilbaşı Räcäp Tayyip Ärdoğannıñ tübändäge süzlärenä iğtibarnı cälep itte: “Türkiyä dön’yanıñ iñ möhim atom-töş köçlärennän berse bulaçaq. Türkiyä Ğasırı şul uq waqıtta ênergiyaneñ ğasırı bulaçaq.”
“Sabah” basması beldergänçä Milli saqlanu ministrı Hulusi Akar Ukrainanıñ Asqorıma ministrı Aleksandr Kubrakovka Kayserigä säfäre waqıtında Türkiyäneñ berençe cirle häm milli êlektrlı avtomobile “Togg”nı birde.
“Yeni Şafak” gazetı xäbärenä kürä Kocaeli şähäreneñ Gebze rayonında TÜBİTAKnıñ Vakŝina häm daru qamilläşterü şähärçegen açu tantanasında çığış yasağan Sänägät’ häm texnologiya ministrı Mostafa Varank tübändägeçä citkerde: “Şähärçektä biotexnologik daru häm vakŝinalar citeştereläçäk, yaman şeş belän bäyle êşçänleklär alıp barılaçaq, testlar uzdırılaçaq.”
“Hürriyet” basması Transport häm asqorıma ministrı Adil Karaismailoğlunıñ süzlären uquçıları belän urtaqlaşa: “İstanbuldağı aêroportlarda yulçı sanı 38%ka arttı. Bu yılnıñ berençe kvartalında İstanbul aêroportı 16 million yarım, Sabiha Gökçen isemendäge hawa mäydanı 7 million 900 meñ yulçını qabul itte.”
“Star” gazeı yazğança Türkiyädä 2022 yılda 23 uyın şirkätenä barlığı 424 million 700 meñ dollarlık investiŝiya kertelde. Awrupada Londonnan soñ iñ küp uyın kileşüe İstanbulda tözelde. Bar dön’yada isä İstanbul 5nçe buldı.
