Törek matbuğatına küzätü 08.02.2023

“Haber Türk” gazetı cir teträw bulğan töbäklär belän bäyle qararlar turında citkerä.

İlbaşı Räcäp Tayyip Ärdoğan 6nçı fevral’dä Kaxramanmaraşta bulğan cir teträwlär nisbätennän 10 provinśiyäneñ afät töbäge iğ’lan itelüen, 3 aylıq ğadättän tış xäl kertelüen xäbär itte.

“Hürriyet” gazetı Ärdoğannıñ dön’ya liderlarına räxmät äytüen citkerde.

İlbaşı Ärdoğan zilzilädän soñ üzenä telefonnan şaltıratqan däwlät häm xökümät citäkçelärenä räxmäten belderde. “İlebez kiçerüçe bu awır könnärdä teläktäşlegen häm yärdäm täq’dimen bezgä citkerü öçen şaltıratqan, yazğan, belderü yasağan barlıq duslarıbızğa, böten däwlät häm xökümät citäkçelärenä räxmät” dide ul.

“Vatan” gazetı yazğança, böten dön’yada tanılğan sänğat’çelär Türkiyägä teläktäşlek yullamaları yasadı

Kaxramanmaraş cir teträwendä xaräbälär astında qaluçılarnı êzläw-qotqaru êşläre däwam itkändä mäşhür şäxeslär Türkiyägä teläktäşlegen belderde. Rassel Krou, Antonio Banderas, Yevgeniy Grinko, Mark Alan Ruffalo, Jey-Jey Joxanson, Dua Lipa, Mark Êliaxunı da kertep bik küp aktyer häm sänğat’çe sośial’ media aşa Türkiyäneñ qayğısın urtaqlaştı.

“Sabah” gazetı “Türkiyä ber yöräk buldı” dip yaza

Antaliyadağı turizmçılar cir teträwdän zıyan kürüçelär öçen 9 meñ 450 nomer äzerläde. 15 meñ keşegä bülmä bireläçäk. Nomer sannarın arttıru öçen tırışalar. Meñnärçä volontyer töbäktäge êzläw-qotqaru êşçänleklärendä qatnaşu öçen möräcäğat’ itte. Donor bulırğa teläwçe watandaşlar isä qan birü noqtalarında çiratlar barlıqqa kiterde.  

“Star” gazetı törle illärdän Türkiyägä yärdäm fondı bülenüen xäbär itä.

Küp kenä däwlät 10 töbäkkä zıyan salğan zilziläneñ qorbannarı öçen yärdäm fondı oyıştırdı. Paqıstanda xökümät räise Şaxbaz Şärif kürsätmäse belän fond buldırıldı. Tayvan’ isä 2 million dollar külämendä yärdäm cibäräçägen belderde. AQŞ däwlät departamentı süzçese Ned Prays ta Türkiyä belän Süriyägä humanitar yärdäm yasalaçağın xäbär itte. Qırğızstan da yärdäm kampaniyäse başladı.