Törek matbuğatına küzätü 12.01.2023

”Sabah” gazetı “İlbaşı Ärdoğan Könbatışqa reakśiya belderde” isemle yazmasında citkergänçä, Türkiyä ilbaşı Räcäp Tayyip Ärdoğan kiçä başqala Änkarada yasağan çığışında terrorçılıqqa qarşı köräştä ikeyözle totış kürsätkän Könbatışqa reakśiya belderde. “Türkiyäneñ terrorçılıq belän köräşenä qıyıq qarawçılar çınbarlıqnı küräçäk. Awrupadağı terror tarafdarlarına qarşı çaralar kürüdä soñğa qalğan sayın qurqınıç ta kön sayın arta baraçaq “ dide ilbaşı Ärdoğan.

“Haber Türk” basması “Şäntop prinś Garriğa reakśiya belderde” isemle yazmasında citkergänçä,  Türkiyä Böyek Millät Mäclese räise Mostafa Şäntop Angliyä patşa ğailäsennän ayırılğan prinś Garrinıñ Äfğanstanda 25 keşene üterüe belän bäyle belderüenä reakśiyä citkerde. Şäntop prinś Garrinıñ süzläreneñ barı aq awrupalınıñ qaraşı tügellegen, ber ük waqıtta ber mädäniyät, poziśiya, töşençäne kürsätüen assızıqladı.

”Hürriyet” gazetı ministr Karaismailoğlunıñ “Aêroportlarıbızda 182 million 334 meñ yulçı qabul ittek” digän süzlären uquçıları belän urtaqlaşa. Türkiyä transport häm asqorma ministrı Adil Karaismailoğlu äytüençä, 2022 nçe hawa mäydannarında xezmät kürsätelgän yulçılar sanı annan êlekke yıl belän çağıştırğanda 42,1%qa artıp 182 mllion 334 meñgä citkän.

”Vatan” gazetı “Dön’ya gigantı Türkiyägä kilä” dip yaza. Türkiyä sänäğat’ häm texnologiya ministrı Mostafa Varank Amerikanıñ êlektr belän êşläwçe avtomobil’lär citeşterüçe  şirkäte “Tesla”nıñ Türkiyä bazarına kerergä teläwen häm moñıñ belän bäyle êşçänleklärneñ däwam itüen belderde.  

“Yeni Şafak” basması “47 ilgä 1 milliard dollardan artıq êksport başqarıldı” dip xäbär itä. Türkiyäneñ 1 milliard dollardan artıq êksport başqarğan illär sanı uzğan yıl 43 tän 47 gä arttı. Germaniya, Amerika Quşma Ştatları, Böyekbritaniya iñ yaxşı öçlekkä kerdelär.