Törek matbuğatına küzätü 03.01.2023

“Sabah” gazetı Türkiyä ilbaşı Räcäp Tayyip Ärdoğannıñ süzlären uquçıları beläñ urtaqlaşa: “Bar närsägä qaramastan 2022 yılğı êksportıbız annan aldağı yılğa kürä 12,9%lık artış belän 254,2 milliard dollar bularaq çınğa aştı. Bu san cömhüriyät tarixıbızda rekord.”

“Hürriyet” basması beldergänçä 2023neñ berençe könnärendä dä dön’yanıñ iğtibarı Türkiyädä. “Foreign Policy” yaña yılda bulaçaq waqıyğalar bitenä Ärdoğan analizın yazdı. Türkiyädäge saylawlarğa da kiñ urın birelgän xäbärdä bolay diyelä: “Ärdoğan 2002yılğı saylawda ciñü yawladı, 2003tän prem’yer-ministr buldı häm ul waqıttan birle Änkaranıñ iñ möhim keşese.”

“Yenişafak” gazetı xäbärenä kürä uzğan yılnı dön’ya birjaları arasında investorına iñ küp keremne Birja İstanbul qazandırdı. “BIST 100” indeksı 2022dä 196,57%ka arttı, iñ yaqın köndäşe bulğan “Argentina S&P Merval” 135,28%ka kütärelde. Uzğan yılnı Amerika Quşma Ştatları, Qıtay häm Awrupanıñ möhim birjalarında yuğaltular kürelde.

“Star” basması citkergänçä 2022dä hawa yulı belän Antaliyağa 13 millionnan artıq turist kilde, bıyılnıñ berençe könendä isä 64 oçqıçta 9027 turist kilde. Uzğan yılnı şähärgä iñ küp nemeŝlar kilgän bulsa, 1 ğıynwar könne Rusiyä turistları kübräk ide.

“Watan” gazetı yazğança Evrokontrol’nıñ 2022 yılğı xisabına kürä İstanbul aêroportı könenä urtaçaq 1156 oçqıç säfäre belän Awrupanıñ iñ tığız hawa mäydanı buldı.