Törek matbuğatına küzätü 12.12.2022

“Xörriyät” gazetı yazğança Türkiyä ilbaşı Räcäp Tayyip Ärdoğan Rusiyä däwlät başlığı Vladimir Putin belän telefonnan söyläşte. Söyäşüdä ênergetika belän ber rättän Türkiyä-Rusiyä mönäsäbätläre qaraldı, aşlıq koridorı häm terrorçılıqqa qarşı köräş belän regional’ mäs’älälär quzğatıldı.

“Sabah” basması beldergänçä Türkiyä ilbaşı Räcäp Tayyip Ärdoğan Putin belän ütkärgän telefon söyläşüendä Süriyäneñ tön’yağındağı terrorçılarğa qarşı xäräkät yullaması iğtibarnı cälep itte. Ärdoğan Putinğa 2019 yılğı Soçi kileşüenä yaraqlı räweştä terrorçılarnı berençe planda çiktän kimendä 30 çaqrımğa qadär çistartunıñ möhim buluın belderde.

“Star” gazetı xäbärenä kürä Türkiyä ilbaşı Räcäp Tayyip Ärdoğan Ukraina prezidentı Vladimir Zelenskiy belän dä telefonnan söyläşte. Ärdoğan söyläşüdä awır uzaçaq qış aylarında Ukraina xalqınıñ gumanitar yärdäm ixtıyaclarınıñ qanäğat’länderelüe öçen êşçänleklär alıp baruların, Zaporoj’ye Atom-töş ênergiya stanŝiyase mäs’äläsendä dä çişeleşkä ömetlänülären äytte.

“Xäbär türk” basması Bötendön’ya säwdä oyışmasınıñ AQŞ 2018 yılda aralarında Türkiyä dä bulğan illärdän qorıç häm alyuminiy importına kertkän östämä tamğaxanä salımnarınıñ global’ säwdä qağıydälären bozuına qarar birüen citkerä.

“Yeni Şafak” gazetı yazğança Sänägät’ häm Texnologiya ministrı Mostafa Varank Türkiyä Böyek Millät Mäclesendäge byudjet söyläşülärenä Türkiyäneñ cirle avtomobile TOGG belän kitte. Ministr Varank: “Türkiyäneñ 60 yıllıq dulqınlanuı, xıyalı çınğa aştı. Bu ğorurlıqnı watandaşlarıbız kürsen dip telädek,” – dide.